២-គោលនយោបាយ និងអាទិភាព |
២-១-ថាមពលអគិ្គសនី |
តាំងពីខែ តុលា ឆ្នាំ១៩៩៤ រាជរដ្ឋាភិបាលកម្ពុជាបានកំណត់នូវនយោបាយជាតិមួយក្នុងការអភិវឌ្ឍវិស័យថាមពលនៅកម្ពុជា ដែលនយោបាយនេះកំពុងត្រូវបានធ្វើឲ្យចេញជារូបរាងពិតប្រាកដបន្តិចម្តងៗ ហើយតាមរយៈការខិតខំរបស់អតីតក្រសួងឧស្សាហកម្ម រ៉ែ និងថាមពលកន្លងមក និងបន្តវេនដោយក្រសួងរ៉ែ និងថាមពលបច្ចុប្បន្ន។ ខ្លឹមសារនៃនយោបាយជាតិក្នុងការអភិវឌ្ឍវិស័យថាមពលនៅកម្ពុជា មានដូចខាងក្រោម៖ |
១-ជម្រុញការរុករក និងការអភិវឌ្ឍប្រភពថាមពលដែលមានលក្ខណៈបរិស្ថានអនុគ្រោះ ដើម្បីផ្គត់ផ្គង់អគ្គិសនីឲ្យបានគ្រប់គ្រាន់ដល់គ្រប់ផ្នែកនៃវិស័យសេដ្ឋកិច្ចកម្ពុជា ២-ធានាការផ្គត់ផ្គង់អគ្គិសនីដែលមានសុវត្តិភាព និងស្ថិរភាពក្នុងថ្លៃមួយសមស្រប ដើម្បីសម្រួលដល់ការអភិវឌ្ឍផ្នែកវិនិយោគនៅកម្ពុជា និងការអភិវឌ្ឍសេដ្ឋកិច្ចជាតិ ៣-ជម្រុញការប្រើប្រាស់ថាមពលឲ្យមានប្រសិទ្ធភាព ព្រមទាំងបន្ថយនូវឥទ្ធិពលមិនល្អខាងផ្នែកបរិ-ស្ថានដែលបណ្តាលមកពីការផ្គត់ផ្គង់ និងការប្រើប្រាស់ថាមពលនេះ ៤-ជម្រុញការចូលរួមរបស់ផ្នែកឯកជននៅក្នុងការអភិវឌ្ឍវិស័យថាមពល។ |
ដើម្បីចូលរួមកាត់បន្ថយភាពក្រីក្រ និងបង្កើតសុខដុមនីយភាពនៃការរស់នៅរបស់ប្រជាជននៅតំបន់ជនបទ រាជរដ្ឋាភិបាលបានជំរុញការអភិវឌ្ឍអគ្គិសនីភាវូបនីយកម្មជនបទជាបន្តទៀត ដើម្បីធ្វើយ៉ាងណាម្រេចឲ្យបាននូវគោលដៅជាយុទ្ធសាស្រ្តចំនួនពីរគឺ |
១-ដល់ឆ្នំា២០២០ ភូមិទំាងអស់ទូទំាងព្រះរាជាណាចក្រកម្ពុជា នឹងមានអគ្គិសនីប្រើប្រាស់ពីប្រភពអគិ្គសនីផេ្សងៗ និង ២-ដល់ឆ្នំា២០៣០ យ៉ាងហោច ៩០% នៃគ្រួសារទំាងអស់ទូទាំងព្រះរាជា-ណាចក្រកម្ពុជា នឹងមានអគ្គិសនីដែលមានគុណភាពដូចអគិ្គសនីពីខែ្សបណ្តាញជាតិប្រើប្រាស់។ |
២-២-ប្រសិទ្ធភាពថាមពល និងសន្សំសំចៃថាមពល |
ដើម្បីសម្រេចតាមគោលដៅកំណត់ខាងលើនេះ រាជរដ្ឋាភិបាលក្នុងនីតិកាលទី ៦ នឹងផ្តោតការយកចិត្តទុកដាក់លើ៖ |
ទី១៖ គ្រប់គ្រង និងតំហែទាំហេដ្ឋារចនាសម្ព័ន្ឋដែលមានស្រាប់ ដូចជាអគារ ផ្លូវ និងដំណើរការឧស្សាហកម្មផ្សេងៗដែលបាននិងកំពុងប្រើប្រាស់ថាមពល ឲ្យមានប្រសិទ្ធភាពខ្ពស់ |
ទី២៖ជម្រុញការផ្ទេរ និងការប្រើប្រាស់បច្ចេកវិទ្យាថាមពលដែលមានប្រសិទ្ធភាពខ្ពស់ ដើម្បីកាត់បន្ថយការប្រើប្រាស់ថាមពលឲ្យក្នុងកម្រិត ២០% នៅឆ្នាំ២០៣៥ ដោយធៀបមូលដ្ឋានគោលឆ្នាំ២០១៤ ដែលក្នុងនោះមាន ២៥% សម្រាប់វិស័យអគារ និង២៥% សម្រាប់វិស័យឧស្សាហកម្ម ព្រមទាំង១៥% សម្រាប់វិស័យដឹកជញ្ជូន។ |
២-៣-វិទ្យាសាស្ត្រ និងបច្ចេកវិទ្យាបរមាណូស៊ីវិល រួមទាំងវិទ្យុសកម្ម |
ការអភិវឌ្ឍវិទ្យាសាស្ត្រ និងបច្ចេកវិទ្យាបរមាណូស៊ីវិល រួមទាំងវិទ្យុសកម្ម ជាជំហានមួយដ៏សំខាន់នាពេលបច្ចុប្បន្ន ក៏ដូចជានាពេលអនាគត សម្រាប់ជំរុញឲ្យមានការកំណើនសេដ្ឋកិច្ចជាតិ ការអភិវឌ្ឍវិស័យផ្សេងៗ ក្នុងការលើកកម្ពស់សន្តិសុខ សុវត្ថិភាព ការការពារសន្តិសុខ សុខុមាលភាព និងគុណភាពរស់នៅរបស់ប្រជាពលរដ្ឋ។ |
ក្នុងនីតិកាលទី៦ នៃរដ្ឋសភានេះ រាជរដ្ឋាភិបាលនឹងផ្តោតអាទិភាពលើ៖ |
ទី១៖ គ្រប់គ្រង និងជំរុញការស្រាវជ្រាវ ការអភិវឌ្ឍ និងការប្រើប្រាស់បរមាណូស៊ីវិល រួមទាំងវិទ្យុសកម្ម ក្នុងគោលបំណងបម្រើឲ្យសន្តិភាព មិនរីកសាយភាយ មានសន្តិសុខ និងមានសុវត្ថិភាព |
ទី២៖ អភិវឌ្ឍន៍ធនធានមនុស្សប្រកបដោយគុណភាព និងសមត្ថភាព ដោយផ្តោតលើការស្រាវជ្រាវ និងបណ្តុះបណ្តាលវិទ្យាសាស្ត្រ និងបច្ចេកវិទ្យាបរមាណូស៊ីវិល រួមទាំងវិទ្យុសកម្ម ដើម្បីទាញយកគុណប្រយោជន៍សម្រាប់ជម្រុញការអភិវឌ្ឍសង្គមសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជន |