ពិធីសម្ពោធដាក់ឲ្យដំណើរការវារីអគ្គិសនីស្ទឹងអាតៃ និងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ក្រោមអធិបតីភាព ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
 ខេត្តពោធិ៍សាត់ ៖ នាថ្ងៃទី២៧ ខែមីនា ឆ្នាំ២០១៤ នៅសង្កាត់រលាប ក្រុងពោធិ៍សាត់ ខេត្តពោធិ៍សាត់ ក្រសួងរ៉ែ និងថាមពល សហការជាមួយក្រុមហ៊ុន China Datang Corporation (ក្រុមហ៊ុន CHD (Cambodia) Hydropower Development Co., Ltd អនុវត្តការសាងសង់គម្រោងវារីអគ្គិសនីស្ទឹងអាតៃនិងក្រុមហ៊ុន Cambodia Power Grid Co., Ltd.អនុវត្តការសាងសង់ខ្សែបណ្តាញ)ដែលជាក្រុមហ៊ុនមកពីប្រទេសចិនបានរៀបចំពិធីសម្ពោធដាក់ឲ្យ ដំណើរការវារីអគ្គិសនីស្ទឹងអាតៃនិងខ្សែបណ្តាញបញ្ជូនភ្នំពេញ-  កំពង់ឆ្នាំង-ពោធិ៍សាត់-បាត់ដំបងក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ។

ចូលរួមក្នុងកម្មវិធីនោះដែរ រួមមាន ឯកឧត្តម លោកជំទាវ អ្នកឧកញ៉ា លោកឧកញ៉ា អស់លោក លោកស្រី មកពីព្រឹទ្ធសភា រដ្ឋសភា រាជរដ្ឋាភិបាល ឯកអគ្គរដ្ឋទូត-ឯកអគ្គរាជទូត ក្រសួង-ស្ថាប័នពាក់ព័ន្ធជាច្រើនទៀត និង ផ្នែកឯកជន។

គម្រោងវារីអគ្គិសនីស្ទឹងអាតៃគឺជាគម្រោងមួយស្ថិតនៅតំបន់ត្រីកោណកំពង់ស្ពឺ កោះកុង ពោធិ៍សាត់ ដែលមានស្ថានីយក្នុងឃុំអូរសោមស្រុកវាលវែង ខេត្ដពោធិ៍សាត់ មានចម្ងាយប្រមាណ ១៧៥ គីឡូម៉ែត្រ ពីទីរួមខេត្តពោធិ៍សាត់។ ជារៀងរាល់ឆ្នាំ ស្ទឹងអាតៃដែលមានផ្ទៃរងទឹកភ្លៀង ៥៩០ គីឡូម៉ែត្រក្រឡា ត្រងយកទឹកភ្លៀងបានប្រមាណ ៥១០ លានម៉ែត្រត្រីគុណ រួចនាពេលកន្លងមកបរិមាណទឹកនេះបានហូរចូលទៅក្នុងសមុទ្រ ដោយពុំមានការប្រើប្រាស់អ្វីទេ។ លក្ខណៈធម្មជាតិនិងភូមិសាស្ដ្ររបស់ស្ទឹងនេះ ផ្ដល់លទ្ធភាពឲ្យយើងអាចសាងសង់ជាទំនប់ដើម្បីស្ដុកទឹកបង្កើត ជាវារីអគ្គិសនីមួយហៅថាទំនប់វារីអគ្គិសនីស្ទឹងអាតៃ។

ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល បានរាយការណ៍សង្ខេបជូនសម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងអង្គពិធីទាំងមូល អំពីការអភិវឌ្ឍវិស័យអគ្គិសនីនៅកម្ពុជា ជាពិសេសការអភិវឌ្ឍគម្រោងវារីអគ្គិសនីស្ទឹងអាតៃ និងគម្រោងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង ។ឆ្លើយតបតាមការអំពាវនាវរបស់អតីតក្រសួងឧស្សាហកម្ម រ៉ែ និងថាមពល អភិបាលខេត្តនិងជាប្រធានសភាគណបក្សកុម្មុយនីស្តចិនរបស់ខេត្ត យូណាន បានចាត់តាំងក្រុមហ៊ុន China Yunnan Corporationហៅកាត់ CYCឲ្យសហការជាមួយក្រសួង ធ្វើការសិក្សាបុរេសមិទ្ធិលទ្ធភាព និងសមិទ្ធិលទ្ធភាពគម្រោងវារីអគ្គិសនីស្ទឹងអាតៃ។ជាងពីរឆ្នាំនៃការខិតខំប្រឹងប្រែងនិងផ្សងគ្រោះថ្នាក់ជាមួយការ លំបាកនានា ការចំណាយទុនផ្ទាល់ខ្លួនជាច្រើន អ្នកសិក្សារបស់ក្រុមហ៊ុនបានបញ្ចប់ទាំងស្រុងការសិក្សាសមិទ្ធិ លទ្ធភាព ហើយលទ្ធផលនៃការសិក្សាបានបង្ហាញថាគម្រោង នេះពិតជាមានប្រសិទ្ធភាពសេដ្ឋកិច្ចខ្ពស់។ បន្ទាប់ពីគណកម្មអន្តរក្រសួងបានបញ្ចប់ការចរចាការវិនិយោគ ជាមួយក្រុមហ៊ុនរួចមក នៅថ្ងៃទី០៩ ខែកុម្ភៈ ឆ្នាំ២០០៧ រាជរដ្ឋាភិបាលបានសម្រេចក្នុងសម័យប្រជុំពេញអង្គគណៈរដ្ឋមន្រ្តី ឲ្យអតីតក្រសួងឧស្សាហកម្មរ៉ែ និងថាមពល ចុះហត្ថលេខាលើកិច្ចព្រមព្រៀងគម្រោងវារី-អគ្គិសនីស្ទឹងអាតៃជាមួយក្រុមហ៊ុន CYC និងគម្រោងខ្សែបណ្តាញបញ្ជូន ភ្នំពេញ-កំពង់ឆ្នាំង-ពោធិ៍សាត់-បាត់ដំបងជាមួយក្រុមហ៊ុន Yunnan Southeast-Asia Economy and Technology Investment Industrial Co., Ltd នៅថ្ងៃទី១៦ ខែកុម្ភៈ ឆ្នាំ២០០៧។ បន្ទាប់មកក្រុមហ៊ុន CYC បានប្រគល់សិទ្ធិវិនិយោគ-សាងសង់គម្រោងឲ្យទៅដៃគូគឺក្រុមហ៊ុន ChinaDatangCorporation។ នៅពេលទទួលបានសិទ្ធិនាំមុខវិនិយោគសាងសង់គម្រោងក្រុមហ៊ុន China Datang Corporation បានបង្កើតក្រុមហ៊ុនចំនួន២ គឺក្រុមហ៊ុន CHD (Cambodia) Hydropower Development Co., Ltd អនុវត្តការសាងសង់គម្រោងវារីអគ្គិសនីស្ទឹងអាតៃ និងបានដាក់ឲ្យដំណើរការអាជីវកម្មនៅខែកញ្ញា ឆ្នាំ២០១៣ និងក្រុមហ៊ុន CambodiaPower Grid Co., Ltd អនុវត្តការសាងសង់គម្រោងខ្សែបណ្តាញបញ្ជូនភ្នំពេញ-កំពង់ឆ្នាំង- ពោធិ៍សាត់-បាត់ដំបង និងបានដាក់ឲ្យដំណើរការអាជីវកម្មនៅខែកុម្ភៈ ឆ្នាំ២០១៣ រហូតដល់បច្ចុប្បន្ន ប្រកបដោយជោគជ័យ។

យោងតាមកិច្ចព្រមព្រៀងរបស់គម្រោងវារីអគ្គិសនីស្ទឹងអាតៃ និងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបងមានល័ក្ខខ័ណ្ឌវិនិយោគដូចខាងក្រោម៖
១-គម្រោងវារីអគ្គិសនីស្ទឹងអាតៃ អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់៖
-ទំហំវិនិយោគសម្រាប់វារីអគ្គិសនីស្ទឹងអាតៃ ១៩៩,៩៧ លានដុល្លារអាមេរិក និងសម្រាប់អនុស្ថានីយរួមអូរសោមនិងខ្សែបណ្តាញបញ្ជូនទៅ អនុស្ថានីយ៍ពោធិ៍សាត់ ៥៥,៣៣ លានដុល្លារអាមេរិក ។ ទំហំវិនិយោគសរុបទាំងមូល ២៥៥,៣០ លានដុល្លារអាមេរិក ។
-វិនិយោគតាមរូបភាព សាងសង់-ដំណើរការ-ផ្ទេរ(BOT)សម្រាប់វារីអគ្គិសនីស្ទឹងអាតៃ និងសាងសង់-ផ្ទេរ(BT)សម្រាប់អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ ។
-បរិមាណថាមពលផលិតបានជាមធ្យមប្រចាំឆ្នាំ ៤៦៥លានគីឡូវ៉ាត់ម៉ោងក្នុង១ឆ្នាំ
២-គម្រោងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង៖
-ទំហំវិនិយោគសរុប ១១៣,៣៩ លានដុល្លារអាមេរិក
-វិនិយោគតាមរូបភាព សាងសង់-ដំណើរការ-ផ្ទេរ (BOT)
-រយៈពេលសម្បទាន ២៧ ឆ្នាំ ក្នុងនោះ ២ឆ្នាំ សម្រាប់ការសាងសង់ និង ២៥ឆ្នាំសំរាប់ធ្វើអាជីវកម្ម ចំណូលពន្ធចូលថវិការដ្ឋរបស់គម្រោងទាំង២នេះ មានដូចខាងក្រោមៈ
១-ពន្ធពីការវិនិយោគម្រោងវារីអគ្គិសនីស្ទឹងអាតៃ អនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់ជាមធ្យម ៥,៣០១លានដុល្លារអាមេរិក ក្នុង១ឆ្នាំ ឬសរុបរួម១៥៩,០៣លានដុល្លារអាមេរិក ក្នុងរយៈពេលសម្បទាន៣០ឆ្នាំ
២-ពន្ធពីការវិនិយោគគម្រោងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបងជាមធ្យម ២,៤៣០លានដុល្លារអាមេរិក ក្នុង១ឆ្នាំ ឬ សរុបរួម ៦០,៧៥លានដុល្លារអាមេរិកក្នុងរយៈពេលសម្បទាន ២៥ឆ្នាំ ដោយមិនទាន់គិតចំណូលពន្ធអាករលើតម្លៃបន្ថែម (VAT) ពន្ធលើបៀវត្ស និងចំណូលពន្ធដទៃទៀតដែលអគ្គិសនីកម្ពុជា និងអ្នកចែកចាយបន្តផ្សេងទៀត (អ្នកជាវដុំ) ត្រូវបង់ជូនរដ្ឋ នៅពេលទទួលបានអគ្គិសនីយកទៅចែកចាយបន្តដល់អ្នកប្រើប្រាស់។

ហេដ្ឋារចនាសម្ព័ន្ធនិងលក្ខណៈបច្ចេកទេសសំខាន់ៗ ដែលក្រុមហ៊ុនត្រូវសាងសង់មានដូចខាងក្រោម៖
១-គម្រោងវារីអគ្គិសនីស្ទឹងអាតៃអនុស្ថានីយរួមអូរសោម និងខ្សែបណ្តាញបញ្ជូនទៅអនុស្ថានីយពោធិ៍សាត់៖
-មានទំនប់ ២ ជាដំណាក់(Cascades) ជាប្រភេទទំនប់ចាក់បំពេញថ្មនៅច្រាំងសងខាង ទំនប់បេតុងនិងទំនប់បង្ហៀរ នៅកណ្តាល ។
-ស្ថានីយវារីអគ្គិសនី ២:ស្ថានីយវារីអគ្គិសនីលើ មានអានុភាព ២០ មេហ្កាវ៉ាត់ និងស្ថានីយវារីអគ្គិសនីក្រោម មានអានុភាព ១០០មេហ្កាវ៉ាត់សរុបអានុភាពទាំងអស់ ១២០មេហ្កាវ៉ាត់អនុស្ថានីយរួមអូរសោម១កន្លែង។
-រូងប្រព័ន្ធបង្ហូរទឹកក្រោមដី រួមទាំងរូងបំពង់សម្ពាធខ្ពស់ មានប្រវែង៦២៦៥ម៉ែត្រ
-ខ្សែបញ្ជូនតង់ស្យុង ១១៥ គីឡូវ៉ុលភ្ជាប់ពីស្ថានីយវារីអគ្គិសនី ស្ទឹងអាតៃទៅអនុស្ថានីយរួមអូរសោម
-ខ្សែបញ្ជូនតង់ស្យុង ២៣០ គីឡូវ៉ុលភ្ជាប់ពីអនុស្ថានីយរួមអូរសោម ទៅអនុស្ថានីយពោធិ៍សាត់
២-គម្រោងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបង៖
-ខ្សែបណ្តាញបញ្ជូន ២៣០ គីឡូវ៉ុល ប្រវែង ៣០២គ.ម. ។
-អនុស្ថានីយកំពង់ឆ្នាំងអនុស្ថានីយពោធិ៍សាត់ អនុស្ថានីយបាត់ដំបង ការសងសង់គម្រោងវារីអគ្គិសនី ស្ទឹងអាតៃនិងខ្សែបណ្តាញបញ្ជូនភ្នំពេញ-កំពង់ឆ្នាំង-ពោធិ៍សាត់-បាត់ដំបងមានផលប៉ះពាល់បរិស្ថាន និងសង្គមតិចតួច ហើយនឹងផ្ដល់នូវប្រភពអគ្គិសនីមួយដែលជាធនធានធម្មជាតិ ក្នុងស្រុកអាចកាត់បន្ថយការប្រើប្រាស់ប្រេងឥន្ធនៈដើម្បីផលិតអគ្គិសនី មានថ្លៃលក់អគ្គិសនីថេរ បង្កើនសមត្ថភាពផ្គត់ផ្គង់អគ្គិសនីបង្កើនឯករាជ្យភាព និងសន្ដិសុខថាមពលព្រមទាំងកាត់បន្ថយហានិភ័យផ្នែកថាមពល ដែលជាវិភាគទានដ៍សំខាន់ សំរាប់ចូលរួមដល់ការអភិវឌ្ឍសេដ្ឋកិច្ចជាតិ រួមចំណែកក្នុងការកាត់បន្ថយភាពក្រីក្រ៕
ព្រហស្បតិ៍ 27 មិនា 2014  |  បានអាន 1614
អង្គភាពក្រោមឱវាទ
ថ្ងៃនេះ :
00629
ម្សិលមិញ :
00930
សរុប :
01086729
Flag Counter