បន្ទាប់ពីរាជរដ្ឋាភិបាល បានប្រកាសបង្កើត ក្រសួងរ៉ែ និងថាមពល ថ្មីជាផ្លូវការ កាលពីថ្ងៃទី២៧ ខែធ្នូ ឆ្នាំ២០១៣ ថ្នាក់ដឹកនាំរបស់ក្រសួងរ៉ែ និងថាមពលគ្រប់ជាន់ថ្នាក់ ក្រោមការដឹកនាំរបស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ទៅលើវិស័យធំៗចំនួន៣ រួមមានរ៉ែ ថាមពល និង ប្រេងកាត កំពុងតែមានសកម្មភាពយ៉ាងមមាញឹក ក្នុងការរៀបចំការគ្រប់គ្រងហេដ្ឋារចនាសម្ព័ន្ធគ្រប់លំដាប់ថ្នាក់ ដើម្បីអនុវត្តបេសកម្មការងារបន្តប្រកបដោយតម្លាភាព និងប្រសិទ្ធិភាពការងារខ្ពស់ថែមទៀត។
ជាក់ស្តែង ក្រៅពីការជ្រើសរើសមន្រ្តីក្របខណ្ឌថ្មីឆ្នាំ២០១៤ ក្រសួងក៏បានតែងតាំងមន្ត្រីជាច្រើនរូបចូលកាន់តំណែង និងតួនាទីថ្មី នៅតាមមន្ទីរក្រសួង ២៥រាជធានី ខេត្ត និងអង្គភាពចំណុះនានារបស់ក្រសួង ដើម្បីជួយសម្រួលដល់ដំណើរការការងាររបស់អង្គភាពនីមួយៗអោយកាន់តែមានប្រសិទ្ធភាព និងទទួលបានលទ្ធផលល្អ។
នីតិកាលថ្មីនេះ ក្រសួងរ៉ែ និងថាមពល មានបេសកម្មជំរុញការប្រើប្រាស់ឲ្យអស់លទ្ធភាព និងប្រកបដោយសុចរិតភាព នូវសក្តានុពលរបស់វិស័យឧស្សាហកម្មនិស្សារណកម្ម ដូចជា ការធ្វើអាជីវកម្មរ៉ែ ប្រេងកាត និងឧស្ម័ន ព្រមទាំងការអភិវឌ្ឍវិស័យអគ្គិសនីជនបទ ការជំរុញពិពិធកម្មប្រភពថាមពល ដែលនឹងជំរុញការពង្រីកវិសាលភាពគ្របដណ្តប់នៃសេវាផ្គត់ផ្គង់ អគ្គិសនីដែលមានតំលៃសមរម្យឲ្យបានដល់ប្រជាជនគ្រប់ច្រកល្ហក តាមរយៈការជម្រុញការអនុវត្តកម្មវិធីសង្គមកិច្ចនានារបស់មូលនិធិអគ្គិសនីភាវូបនីយកម្មជនបទ ព្រមទាំងភាពជាដៃគូរ និងកិច្ចសហការយ៉ាងជិតស្និត រវាងអង្គភាពពាក់ព័ន្ធរបស់ក្រសួង ជាមួយនឹងគ្រប់ភាគីពាក់ព័ន្ធ ដូចជាអង្គការសង្គម សកម្មជនមូលដ្ឋាន និងសហគមន៍ ដើម្បីបញ្ជៀសទំនាស់សង្គម និងសេដ្ឋកិច្ច។ ជាពិសេស បង្កើនលំហូរចំណូលជាតិពីវិស័យប្រេងកាត ឧស្ម័ន និងរ៉ែ ព្រមទាំងជម្រុញភាពប្រកួតប្រជែងផ្នែកកម្មន្តសាល និងសហគ្រាសធុនតូច និងមធ្យមកម្ពុជា ដើម្បីបង្កើតការងារ និងជម្រុញការនាំចេញប្រេងកាត និងឧស្ម័ន ដោយផ្អែកលើអភិក្រមទីផ្សារ។
ដោយមើលឃើញពីតម្រូវការការងារដ៏ចម្បងនេះ និងមានការស្នើរសុំពីថ្នាក់ដឹកនាំមន្រ្តីតាមមន្ទីររ៉ែ និងថាមពលរាជធានី ខេត្ត និងអង្គភាពចំណុះនានារបស់ក្រសួង ក្រសួងបានសម្រេចបើកសិក្ខាសាលាបណ្តុះបណ្តាលបំពាក់បំប៉នមន្ត្រីរបស់ខ្លួន ស្តីពីការអនុវត្តគោលការណ៍ការងាររបស់ក្រសួងរ៉ែ និងថាមពល រយៈពេល៣ថ្ងៃ ចាប់ពីថ្ងៃទី១៥ ដល់ថ្ងៃទី១៧ ខែកក្កដា ឆ្នាំ២០១៤ នៅសណ្ឋាគារកាំបូឌីយ៉ាណា ដែលអញ្ជើញចូលរួមក្នុងពិធីបើកសិក្ខាសាលាក្រោមវត្តមានឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល។
វគ្គបណ្តុះបណ្តាលនេះ ធ្វើឡើងក្នុងគោលបំណងបំពេញបន្ថែមនូវចំណេះដឹងអោយកាន់តែច្បាស់ និងស៊ីជម្រៅពីគោលការណ៍ការងារពាក់ព័ន្ធទៅនឹងវិស័យទាំងអស់របស់ក្រសួងរ៉ែ និងថាមពល ដែលមានវាគ្មិនអញ្ជើញមកពីក្រសួងស្ថាប័នពាក់ព័ន្ធ រួមមានវត្តមាន ប្រធានអាជ្ញាធរអគ្គិសនី ប្រតិភូរាជរដ្ឋាភិបាលទទួលបន្ទុកជាអគ្គនាយកអគ្គិសនីកម្ពុជា និងអគ្គនាយកគ្រប់អគ្គនាយកដ្ឋានចំណុះក្រសួងរ៉ែ និងថាមពល ក្នុងការចូលរួមធ្វើបទបង្ហាញចែករំលែកបទពិសោធន៍ និងចំណេះដឹងដល់សិក្ខាកាមដែលបានចូលរួម ដើម្បីជាប្រយោជន៍ដល់ដំណើរការការងាររបស់អង្គភាព ក៏ដូចជាក្រសួងទាំងមូល អោយកាន់តែមានប្រសិទ្ធភាព និងទទួលបានលទ្ធផលល្អ នៅក្នុងអាណត្តិថ្មីនីតិកាលទី៥នេះ។
សុក្រ 11 កក្កដា 2014 | បានអាន 1803
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
