រាជធានីភ្នំពេញ៖ នាទីស្តីការក្រសួង រសៀលថ្ងៃទី០១ ខែកញ្ញា ឆ្នាំ២០១៤ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានអនុញ្ញាតិអោយប្រតិភូសមាគមនាវាយុវជនអាស៊ីអាគ្នេយ៍កម្ពុជាប្រមាណ៣៩នាក់ ចូលជួបសំដែងការគួរសម សុំការឧបត្ថម្ភ និងអនុសាសន៍ មុននឹងចេញដំណើរទៅចូលរួមកម្មវិធី នាវាយុវជនអាស៊ីអាគ្នេយ៍លើកទី៤១ នៅតាមប្រទេសអាស៊ាន និងជប៉ុន រយៈពេល៥១ថ្ងៃ ចាប់ពីថ្ងៃទី២៩ ខែតុលា ដល់ថ្ងៃទី១៨ ខែធ្នូ ឆ្នាំ២០១៤ខាងមុខនេះ។
បន្ទាប់ពីប្រធានប្រតិភូយុវជន បានឡើងរាយការណ៍ពីតួនាទីសកម្មភាពរបស់សមាគម ដែលបានអនុវត្ត និងទិសដៅដែលត្រូវអនុវត្តបន្តរួចមក ឯកឧត្តមរដ្ឋមន្ត្រី បានមានប្រសាសន៍ចែករំលែកចំណេះដឹងបទពិសោធន៍ទាក់ទងទៅនឹងការបង្កើតថ្មី និងតួនាទីធំៗចំនួន៣ របស់ក្រសួង រួមមានវិស័យរ៉ែ ថាមពល និង ប្រេងកាត។ នាកិច្ចជំនួបនេះ ឯកឧត្តមរដ្ឋមន្ត្រី បានវាយតំលៃ និងកោតសរសើរខ្ពស់ចំពោះសមាជិកក្រុមនាវាយុវជនកម្ពុជាទាំងអស់ ក៏ដូចជាក្រុមនាវាយុវជនជ័យលាភីទាំង២៩រូប ដែលនឹងត្រូវចេញដំណើរទៅចូលរួមកម្មវិធីនាវាយុវជនអាស៊ីអាគ្នយ៍លើកទី៤១ ដើម្បីនាំយកនូវប្រពៃណីវប្បធម៌ដ៏ល្អផូរផង់របស់កម្ពុជា ទៅបង្ហាញជូនដល់ក្រុមនាវាយុវជនប្រទេសដទៃទៀតក្នុងតំបន់ ប្រយោជន៍ដើម្បីស្វែងរកកិច្ចសហប្រតិបត្តិការជាមួយគ្នា។ ជាពិសេស នាវាយុវជននេះ គឺជានាវាកិច្ចសហប្រតិបត្តិការរវាងប្រទេសអាស៊ាន ជាមួយជប៉ុន ខណៈដែលរដ្ឋាភិបាលជប៉ុនបានកិច្ចខិតខំប្រឹងប្រែងស្វែងរកសុខសន្តិភាពក្នុងតំបន់ ក៏ដូចជាប្រទេសកម្ពុជាក្នុងកំឡុងពេលមានសង្គ្រាម។ ឯកឧត្តមបានលើកឡើងថា ដោយសារតែប្រទេសកម្ពុជាមានសុខសន្តិភាព ស្ថេរភាពនយោបាយ ទើបមានការអភិវឌ្ឍន៍កំណើនសេដ្ឋកិច្ច និងសង្គម រហូតដល់សព្វថ្ងៃនេះ។
ឆ្លៀតក្នុងឱកាសនោះ ឯកឧត្តមរដ្ឋមន្ត្រីបានមានប្រសាសន៍ផ្តាំផ្ញើរដល់ក្រុមនាវាយុវជនកម្ពុជាថា ការចេញដំណើររបស់ក្រុមនាវាយុវជននាពេលនេះ គឺតំណាងអោយប្រទេសកម្ពុជា ហើយក៏ជាមុខមាត់មួយរបស់ប្រទេស ដូច្នេះក្រុមនាវាយុវជនកម្ពុជាទាំងអស់ត្រូវរក្សាអោយបាននូវកិត្តិយស សេចក្តីថ្លៃថ្នូរ ជាពិសេសត្រូវមានសាមគ្គីផ្ទៃក្នុង ខិតខំប្រមូលស្នាដៃជារួមនៅក្នុងក្រុម ក៏ដូចជាសមាគមក្រុមនាវាយុវជនទាំងមូលអោយបានល្អ។ ជាកិច្ចបញ្ចប់ ដើម្បីឆ្លើយតមនឹងសកម្មភាពនានារបស់សមាគមនាវាយុវជនអាស៊ីអាគ្នេយ៍កម្ពុជា ដើម្បីពង្រឹងចំណេះដឹងទូទៅ ចែករំលែកបទពិសោធន៍ កសាងសមត្ថភាពផ្ទាល់ខ្លួន និងក្នុងក្រុម ឯកឧត្តមរដ្ឋមន្ត្រី បានឧបត្ថម្ភថវិការចំនួន ៤លានរៀល ជូនដល់ក្រុមនាវាយុវជនអាស៊ីអាគ្នេយ៍កម្ពុជាលើកទី៤១ និងថតរូបអនុស្សាវរីយ៍ផងដែរ។ គូសបញ្ជាក់ថា នាវាNIPPON MARU របស់នាវាយុវជនអាស៊ីអាគ្នយ៍លើកទី៤១នេះ នឹងចុះចតជាប្រវត្តិសាស្ត្រលើកដំបូងនៅប្រទេសកម្ពុជា រយៈពេល៥ថ្ងៃចាប់ពីថ្ងៃទី១៩ ដល់ថ្ងៃទី២៣ ខែវិចិ្ឆកា ឆ្នាំ២០១៤នេះ។
សុក្រ 05 កញ្ញា 2014 | បានអាន 1354
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
