រាជធានីភ្នំពេញ៖ នារសៀលថ្ងៃទី០៥ ខែកញ្ញា ឆ្នាំ២០១៤ នៅទីស្តីការក្រសួង ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានអនុញ្ញាតិអោយគណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន (US-ASEAN Business Council,INC.) ដែលមានវត្តមានមន្ត្រីប្រតិបត្តិជាន់ខ្ពស់ចំនួន១០រូបរបស់ក្រុមហ៊ុនធំៗលំដាប់ពិភពលោកប្រមាណ៥០០ក្រុមហ៊ុន ចូលជួបសំដែងការគួរសម និងពិភាក្សាការងារ នៅក្នុងដំណើរបំពេញទស្សនៈកិច្ចនៅកម្ពុជា រយៈពេល២ថ្ងៃ។
នៅក្នុងកិច្ចជំនួបនេះ ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងថ្នាក់ដឹកនាំសំខាន់ៗរបស់ក្រសួងជាច្រើនរូបទៀត បានស្វាគមន៍យ៉ាងកក់ក្តៅ ចំពោះវត្តមានគណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន នៅកម្ពុជា ដែលដឹកនាំដោយលោកស្រី Kathleen T Santillo នាយកប្រចាំតំបន់របស់ US-ASEAN Business Council។ ជាពិសេសនៅក្នុងកិច្ចជំនួបនេះ ភាគីទាំងពីរ បានផ្តោតសំខាន់ទៅលើប្រធានបទធំៗចំនួន៣ គឺទី១ តំបន់រុករកប្រេងកាតត្រួតស៊ីគ្នារវាងដែនសមុទ្រកម្ពុជា-ថៃ ទី២ ការអភិវឌ្ឍន៍ថាមពលកកើតឡើងវិញ ទី៣ ថាតើអ្វីជាជំហររបស់ ក្រសួងរ៉ែ និងថាមពល ដើម្បីផ្សារភ្ជាប់រវាងសហគមអាស៊ានឆ្នាំ២០១៥។
នាឱកាសនោះ ឯកឧត្តម អ៊ិត ប្រាំង បានលើកឡើងថា ចំពោះតំបន់រុករកប្រេងត្រួតស៊ីគ្នារវាងដែនសមុទ្រ កម្ពុជា-ថៃ គឺកំពុងតែត្រៀមអោយមានកិច្ចចរចារជាមួយភាគីថៃ ដើម្បីអភិវឌ្ឍន៍តំបន់នោះ ហើយកម្ពុជាក៏ស្វាគមន៍ផងដែរចំពោះក្រុមហ៊ុនអាមេរិកមួយចំនួន ដូចជាក្រុមហ៊ុនGE ដែលវិនិយោគលើថាមពលកកើតឡើងវិញ និង ការអភិវឌ្ឍន៍ប្រព័ន្ធជីវម៉ាស់នៅកម្ពុជា។ ដោយឡែកទាក់ទិននឹងការផ្សារភ្ជាប់រវាងសហគមអាស៊ានឆ្នាំ២០១៥ កម្ពុជាស្វាគមន៍ជានិច្ចចំពោះក្រុមហ៊ុនអាមេរិក ដែលមានគោលបំណងមកអភិវឌ្ឍន៍ប្រព័ន្ធបញ្ជរតែមួយស្តីពីការផ្លាស់ប្តូរទំនិញក្នុងវិស័យអាស៊ានដែលមានក្រសួងសេដ្ឋកិច្ច និងហិរញ្ញវត្ថុ និងអគ្គនាយកដ្ឋានរដ្ឋាករជាអ្នកសម្របសម្រួល ហើយក្នុងនោះក្រសួងរង់ចាំស្វាគមន៍ និងសិក្សាលើការរៀបចំប្រព័ន្ធនេះ។ ជាកិច្ចបញ្ចប់គណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន សង្ឃឹមថានឹងមានឱកាសបានចូលជួបសំដែងការគួរសមជាមួយ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ក្នុងកិច្ចប្រជុំរដ្ឋមន្ត្រីថាមពលអាស៊ាន ដែលនឹងប្រព្រឹត្តិទៅនៅថ្ងៃទី២២-២៤ ខែកញ្ញា ឆ្នាំ២០១៤ នាទីក្រុងវៀងច័ន្ទ ប្រទេសឡាវ។
គួរបញ្ជាក់ថា ដំណើរបំពេញទស្សនៈកិច្ចរបស់គណៈប្រតិភូក្រុមប្រឹក្សាធុរកិច្ចសហរដ្ឋអាមេរិក-អាស៊ាន នៅកម្ពុជានាពេលនេះ បានទទួលការអនុញ្ញាតិដ៏ខ្ពង់ខ្ពស់ចូលជួបសម្តែងការគួរសមជាមួយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាថ្នាក់ដឹកនាំនៃក្រសួងពាណិជ្ជកម្ម ក្រសួងរ៉ែ និងថាមពល ដើម្បីស្វែងយល់អំពីគោលនយោបាយអាទិភាពរបស់រាជរដ្ឋាភិបាលអាណត្តិថ្មី ភាពជាដៃគូរបស់ធុរកិច្ចសហរដ្ឋអាមេរិកជាមួយវិស័យឯកជន និងទស្សនៈវិស័យ ថាតើធ្វើដូចម្តេចដើម្បីអោយវិស័យឯកជនសហរដ្ឋអាមេរិក អាចជួយគាំទ្រកម្ពុជាក្នុងការសម្រេចគោលដៅសហគមន៍សេដ្ឋកិច្ចអាស៊ានឆ្នាំ២០១៥។
ពុធ 10 កញ្ញា 2014 | បានអាន 2541
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
