រាជធានីភ្នំពេញ៖ នាព្រឹកថ្ងៃទី២៩ ខែកញ្ញា ឆ្នាំ២០១៤ សិក្ខាសាលាស្តីពីកត្តាហានិភ័យលើការមិនពាក់មួក សុវត្ថិភាព ការបើកបរក្រោមឥទ្ធិពលនៃគ្រឿងស្រវឹង ដែលរៀបចំដោយគណៈកម្មាធិការជាតិ សុវត្ថិភាពចរាចរណ៍ផ្លូវគោក និងសហភាពសហព័ន្ធយុវជនកម្ពុជា ក្រោមការឧបត្ថម្ភថវិការដោយ Bloomberg Philanthropies បានរៀបចំរយៈពេល១ថ្ងៃកន្លះពីថ្ងៃទី២៩ដល់ព្រឹកថ្ងៃទី៣០ ខែកញ្ញា ឆ្នាំ២០១៤ នៅទីស្តីការក្រសួងរ៉ែ និងថាមពល ក្រោមវត្តមាន ឯកឧត្តម សុះ មុះសិន អនុប្រធានសហភាពសហព័ន្ធយុវជនកម្ពុជា តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ឯកឧត្តម ស៊ុយ ឌីម៉ង់ អគ្គនាយកកិច្ចការទូទៅ ឯកឧត្តម ពៅ ម៉ាលី អគ្គលេខាធិការនៃគណៈកម្មាធិការជាតិសុវត្ថិភាពចរាចរផ្លូវគោក លោក អ៊ឹង ឌីប៉ូឡា អគ្គនាយករងកិច្ចការទូទៅ លោក កែវ ទួត ប្រធាននាយកដ្ឋានរដ្ឋបាល និងព័ត៌មានវិទ្យា ព្រមទាំងមន្ត្រីអគ្គលេខាធិការនៃគ.ស.ច.គ គ្រូបង្គោលរបស់ស.ស.យ.ក និងសមាជិកសហភាពសហព័ន្ធក្រសួង ប្រមាណ៥០រូប អញ្ជើញចូលរួម។
គោលបំណងនៃសិក្ខាសាលានេះ គឺដើម្បីផ្សព្វផ្សាយពញ្ញាក់ស្មារតី និងបង្ហាញពីហានិភ័យនៃការបើកបរមិនពាក់មួកសុវត្ថិភាព និងការបើកបរក្រោមឥទ្ធិពលគ្រឿងស្រវឹង ជូនដល់មន្ត្រីក្រសួងរ៉ែ និងថាមពល ដើម្បីចូលរួមយុទ្ធនាការផ្សព្វផ្សាយកាត់បន្ថយអត្រាគ្រោះថ្នាក់ចរាចរផ្លូវគោក។ ឯកឧត្តម សុះ មុះសិន អនុប្រធានសហភាពសហព័ន្ធយុវជនកម្ពុជា បានមានប្រសាសន៍ថា គ្រោះថ្នាក់ចរាចរផ្លូវគោកមានការកើតឡើងជារៀងរាល់ថ្ងៃ ដែលទាមទារអោយមានការចូលរួមទាំងអស់គ្នា ជាពិសេសយុវជនក្នុងការទប់ស្កាត់អត្រាអ្នកស្លាប់ របួស និងពិការដោយសារគ្រោះថ្នាក់ចរាចរណ៍។ នាឱកាសនោះ ឯកឧត្តម ពៅ ម៉ាលី អគ្គលេខាធិការនៃ គណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានគូសបញ្ជាក់ថា នៅក្នុងសកលលោកអត្រានៃអ្នកស្លាប់ដោយសារគ្រោះថ្នាក់ចរាចរក្នុង១ថ្ងៃមានជាង៣០០០នាក់ ហើយប្រមាណ៩០ភារយនៃការស្លាប់កើតនៅប្រទេសដែលមានចំណូលទាប និងមធ្យម។ រីឯអ្នករងរបួស និងពិការមានប្រមាណ ៥០លាននាក់ និងក្រុមប្រឈមគ្រោះថ្នាក់មានអាយុចន្លោះពី១៥-២៩ឆ្នាំ។ ជាក់ស្តែង នៅប្រទេសកម្ពុជា គ្រោះថ្នាក់ចរាចរក្នុងឆ្នាំ២០១៣ មានជនរងគ្រោះចំនួន ១៦.២២៧នាក់ ក្នុងនោះមានអ្នកស្លាប់ចំនួន ១.៩៥០នាក់ និងរបួសធ្ងន់៥.៦៧១នាក់ ដែលជាមធ្យមភាគស្លាប់ច្រើនជាង៥នាក់។ ហើយប្រសិនបើមិនមានវិធានការទប់ស្កាត់នោះទេ ចំនួនអ្នកស្លាប់ដោយសារគ្រោះថា្នក់ចរាចរនឹងកើនឡើងដល់៣.២០០នាក់នៅឆ្នាំ២០២០។
ឆ្លៀតក្នុងឱកាសនោះ ឯកឧត្តម ស៊ុយ ឌីម៉ង់ អគ្គនាយកកិច្ចការទូទៅ ក៏បានថ្លែងការស្វាគមន៏ និងអរគុណចំពោះវត្តមានសិក្ខាសាលានៃវគ្គបណ្តុះបណ្តាលស្តីពីកត្តាហានិភ័យលើការមិនពាក់មួកសុវត្ថិភាព ការបើកបរក្រោមឥទ្ធិពលនៃគ្រឿងស្រវឹង ជូនដល់មន្ត្រីរបស់ក្រសួងរ៉ែ និងថាមពល ដែលរៀបចំដោយ គណៈកម្មាធិការជាតិសុវត្ថិភាពចរាចរផ្លូវគោក និងសហភាពសហព័ន្ធយុវជនកម្ពុជា។
ជាការឆ្លើយតប តាមរយៈការធ្វើបទបង្ហាញពីក្រុមគ្រូបង្គោលដែលអញ្ជើញមកពី គ.ស.ច.គ និង ស.ស.យ.ក ដោយមន្រ្តីយើងបានធ្វើការពិភាក្សាជាក្រុម ផ្តោតសំខាន់លើប្រធានបទការបើកបរមិនពាក់មួកសុវត្ថិភាព និងក្រោមឥទ្ធិពលនៃគ្រឿងស្រវឹង បានជម្រុញអោយសិក្ខាសាលានៃវគ្គបណ្តុះបណ្តាលនេះ ចាប់ផ្តើម និងបញ្ចប់ដោយទទួលបានចំណេះដឹងជាផ្លែផ្កាគួរជាទីចាប់អារម្មណ៍។
ច័ន្ទ 29 កញ្ញា 2014 | បានអាន 2359
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
