រាជធានីភ្នំពេញ៖ នៅវេលាម៉ោង០៩:០០នាទីព្រឹកថ្ងៃទី៣០ ខែ កញ្ញា ឆ្នាំ២០១៤ នាទីស្តីការក្រសួងរ៉ែ និងថាមពល បានរៀបចំសន្និសីទសារព័ត៌មានបំភ្លឺជុំវិញការបំផ្លើសព័ត៌មានខុសពីការពិត អំពីគម្រោងវារីអគ្គិសនីស្ទឹងជាយអារ៉ែង ក្រោមអធិបតីភាព ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល ថ្នាក់ដឹកនាំ និងមន្ត្រីពាក់ព័ន្ធក្រសួង ដែលមានការចូលរួមពីសំណាក់អ្នកសារព័ត៌មានជាតិ និងអន្តរជាតិ ប្រមាណ៥២នាក់ ។
ឯកឧត្តម អ៊ិត ប្រាំង បានមានប្រសាសន៍ថា គោលបំណងនៃសន្និសីទនាព្រឹកនេះ គឺដើម្បីបំភ្លឺបន្ថែមជាថ្មីម្តងទៀតចំពោះមុខអ្នកសារព័ត៌មានជាតិ និងអន្តរជាតិ ក្រោយពីក្រសួងបានចេញផ្សាយការបំភ្លឺតាមប្រព័ន្ធសារព័ត៌មានកាលពីថ្ងៃទី២៧ ខែកញ្ញា ឆ្នាំ២០១៤កន្លងទៅនេះ។ ឯកឧត្តម បានបញ្ជាក់ថា គម្រោងវារីអគ្គិសនីស្ទឹងជាយអារ៉ែង មានទីតាំងស្ថិតនៅលើស្ទឹងជាយអារ៉ែង ក្នុងស្រុកថ្មបាំង ខេត្តកោះកុង មានចម្ងាយប្រមាណ២០គីឡូម៉ែត ខាងកើតឈៀងខាងត្បូងទីរួមស្រុកថ្មបាំង។ គម្រោងនេះ ត្រូវបានកំណត់សម្រាប់ការអភិវឌ្ឍតាំងពីមុនឆ្នាំ១៩៧០ ជាមួយគម្រោងវារីអគ្គិសនីដ៏ទៃទៀតនៅភាគខាងលិច ដូចជាវារីអគ្គិសនីគិរីរម្យ(មាន៣) កំចាយ អាតៃ ឬស្សីជ្រុំ តាតៃ មេទឹក ពោធិ៍សាត់(មាន២) បាត់ដំបង(មាន២) និងគម្រោងនានាក្នុងអាងទន្លេមេគង្គដែលមានសក្តានុពលសម្រាប់អភិវឌ្ឍន៍។ លើសពីនេះការសិក្សាបច្ចេកទេស បរិស្ថានធម្មជាតិ និងសង្គម បានចាប់ផ្តើមតាំងពីឆ្នាំ២០០៦ ហើយនៅខែវិច្ឆិកា-ធ្នូ ឆ្នាំ២០១៣ មានការផ្ទៀងផ្ទាត់ឡើងវិញនូវលទ្ធផលសិក្សាវាយតំលៃផលប៉ះពាល់បរិស្ថាន និងសង្គមជំហ៊ានដំបូង(ESIA)ទៅលើ ទី១.ការប៉ះពាល់ព្រៃឈើ ដែលក្នុងនោះមានព្រៃស្រោងប្រមាណ៨៧៤ហិចតា និងព្រៃពាក់កណ្តាលស្រោងប្រមាណ៣៧៩០ហិចតា ទី២.ការប៉ះពាល់សត្វព្រៃ មានបក្សីប្រមាណ១១៣ប្រភេទ ថនិកសត្វ៥៣ប្រភេទ ល្មូន ៣១ប្រភេទ និងមច្ឆាជាតិ៤៣ប្រភេទ ទី៣.ផលដែលទទួលបានពីគម្រោងវារីអគ្គិសនីស្ទឹងជាយអារ៉ែងនេះមានអានុភាពតំលើង១០៨មេហ្គាវ៉ាត់អាចដំណើរការស្ទើរពេញ១ឆ្នាំ ដែលបរិមាណថាមពលផលិតបានប្រចាំឆ្នាំមានរហូតដល់៥៩៥លានគីឡូវ៉ាត់ម៉ោង ច្រើនជាងវារីអគ្គិសនីកំចាយ ព្រមទាំងអត្ថប្រយោជន៍ជាច្រើនទៀតដែលទទួលបានពីគម្រោងនេះ។ និងទី៤.ផលប៉ះពាល់ប្រជាពលរដ្ឋនៅតំបន់គម្រោង ដោយយោងតាមការសិក្សាជំហ៊ានដំបូងនៅខែវិចិ្ឆកា-ធ្នូ ឆ្នាំ២០១៣ បានរកឃើញថា គម្រោងមានការប៉ះពាល់ប្រជាពលរដ្ឋចំនួន៣៤៩គ្រួសារ ក្នុង៣ឃុំ ស្មើនឹង៧ភូមិ សរុបមានចំនួន៣៣១ខ្នងផ្ទះ និងសាលារៀន វត្តអារាម ជាដើម..។ល។ ចំពោះដំណោះស្រាយនៃផលប៉ះពាល់ ឯកឧត្តម អ៊ិត ប្រាំង បានមានប្រសាសន៍ថា គ្រប់គម្រោងវារីអគ្គិសនីទាំងអស់ត្រូវមានការសិក្សាលម្អិតអំពីផលប៉ះពាល់ដល់បរិស្ថាន និងសង្គម ព្រមទាំងវិធានការនៃការដោះស្រាយផលប៉ះពាល់ទាំងនោះ។ ដោយឡែក ឯកឧត្តម បានសង្គត់ធ្ងន់ថា គម្រោងវារីអគ្គិសនីស្ទឹងជាយអារ៉ែង បច្ចុប្បន្ននេះ អ្នកសិក្សាជំហ៊ានបន្ទាប់កំពុងព្យាយាមសិក្សាលម្អិតនៅតំបន់នោះ គឺមិនទាន់មានសកម្មភាពអភិវឌ្ឍចូលទៅកាប់ព្រៃឈើ ឃួងពិនិត្យដី ឬថ្ម នៅឡើយទេ។ ឯកឧត្តម បានបន្តថា រាល់ការអភិវឌ្ឍគម្រោងវារីអគ្គិសនីមិនមែនសំដៅទៅលើការកាប់ព្រៃឈើនោះទេ គឺសំដៅលើការអភិវឌ្ឍសក្តានុពលធនធានទឹក ធនធានស្ទឹង ធនធានដែលមានទឹកហូរកាត់ដើម្បីផលិតថាមពលអគ្គិសនី។
គួរំលឹកថា គណៈកម្មាធិការទន្លេមេគង្គអន្តរជាតិក៏បានពិនិត្យឡើងវិញ ហើយបានអនុម័ត្តជាផ្លូវការនៅឆ្នាំ១៩៧៣ ដោយបានព្យាករណ៍ថាកំលាំងថាមពលអគ្គិសនីដែលបានពីគម្រោងមានដល់ទៅ ២៦០មេហ្គាវ៉ាត់។ ហើយនៅឆ្នាំ២០០៦ ក៏មានការសិក្សាឡើងវិញរបស់ធនាគាពិភពលោក ក៏ដូចជាការសិក្សារបស់អ្នកជំនាញផ្សេងៗទៀត ក៏បានចាត់ទុកគម្រោងនេះថាជាគម្រោងអាទិភាពដែលត្រូវអភិវឌ្ឍ ហើយនៅតែស្ថិតនៅក្នុងផែនការមេនៃការអភិវឌ្ឍវារីអគ្គិសនីរបស់ជាតិ។ រហូតមកដល់ពេលនេះអ្នកជំនាញការសិក្សាចុងក្រោយ បានរកឃើញថា គម្រោងនេះមានទំហំធំ ដែលអាចនឹងមានផលប៉ះពាល់ច្រើនដល់បរិស្ថាន ហើយបានសម្រេចកាត់បន្ថយកំលាំងអានុភាពនៃការផលិតអគ្គិសនីមកនៅត្រឹម១០៨មេហ្គាវ៉ាត់ ក្នុងន័យកាត់បន្ថយផលប៉ះពាល់មិនអោយស្ថិតនៅក្នុងទំហំធំ។ គូសបញ្ជាក់ផងដែរថា នៅក្នុងសន្និសីទសារព័ត៌មាននេះ ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល ក៏បានឆ្លើយទៅនឹងសំណួរទាក់ទងនឹងចម្ងល់របស់សារធារណៈជនពីសំណាក់អ្នកសារព័ត៌មាននានាផងដែរ។
អង្ការ៍ 30 កញ្ញា 2014 | បានអាន 2201
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
