ក្រសួងរ៉ែ និងថាមពល រៀបចំវគ្គបណ្តុះបណ្តាលជូនដល់មន្ត្រីក្របខណ្ឌថ្មីចំនួន១០០នាក់
 រាជធានីភ្នំពេញ៖ ក្រសួងរ៉ែ និងថាមពល បានរៀបចំវគ្គបណ្តុះបណ្តាលជូនដល់មន្ត្រីក្របខណ្ឌថ្មីដែលទើបប្រឡងជាប់ចំនួន១០០នាក់ រយៈពេល៣ថ្ងៃ ពីថ្ងៃទី១៩ ដល់ថ្ងៃទី២១ ខែវិច្ឆិកា ឆ្នាំ២០១៤ ដែលប្រព្រឹត្តទៅនៅទីស្តីការក្រសួង ក្រោមវត្តមានដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល ព្រមទាំងថ្នាក់ដឹកនាំក្រោមឱវាទក្រសួងជាច្រើនរូបបានអញ្ជើញក្នុងពិធីបើកវគ្គបណ្តុះបណ្តាលនេះ។ ឯកឧត្តម រដ្ឋមន្ត្រី បានមានប្រសាសន៍ថា វគ្គបណ្តុះបណ្តាលនេះធ្វើឡើងក្នុងគោលបំណងណែនាំមន្រ្តីដែលទើបប្រឡងជាប់ក្របខណ្ឌថ្មី អោយបានជ្រាបកាន់តែច្បាស់ពីតួនាទី និងបេសកម្មអនុវត្តការងារ ទៅលើវិស័យអាទិភាពសំខាន់ៗរបស់ក្រសួងទាំងមូល ដោយមានការធ្វើបទបង្ហាញពីសំណាក់ថ្នាក់ដឹកនាំ និងមន្ត្រីជំនាញដែលអញ្ជើញមកពីអគ្គនាយកដ្ឋាន និងនាយកដ្ឋាននានារបស់ក្រសួង។ ជាពិសេស ក្នុងនាមជាមន្ត្រីរាជការក្មួយៗត្រូវមានភាពស្មោះត្រង់ រក្សាការសម្ងាត់ គោរពក្រមសីលធម៌វិជ្ជាជីវៈជាមន្ត្រីរាជការតាមច្បាប់សហលក្ខន្តិកៈមន្ត្រីរាជការ និងគោរពតាមការចាត់តាំងរបស់អង្គភាព។ នៅក្នុងវគ្គបណ្តុះបណ្តាលរយៈពេល៣ថ្ងៃនេះ សិក្ខាកាមដែលជាមន្ត្រីក្របខណ្ឌថ្មីទាំងអស់បានសិក្សាស្វែងយល់ និងជ្រួតជ្រាបពីតួនាទីភារកិច្ចការអនុវត្តការងារជំនាញលើវិស័យនានារបស់ក្រសួង តាមរយៈការធ្វើបទបង្ហាញ និងការសាកសួរបន្ថែមពីសំណាក់សិក្ខាកាមជាមន្ត្រីថ្មីទៅកាន់មន្ត្រីជំនាញ។ វគ្គបណ្តុះបណ្តាលត្រូវបានប្រារព្ធពិធីបិទ ក្រោមវត្តមានឯកឧត្តម ឌិត ទីណា រដ្ឋលេខាធិការ ក្រសួងរ៉ែ និងថាមពល និងមន្ត្រីជំនាញជាច្រើនរូប។ មានប្រសាសន៍នាឱកាសនោះឯកឧត្តម រដ្ឋលេខាធិការ បានថ្លែងកោតសរសើរចំពោះការខិតខំប្រឹងប្រែង និងការសម្រេចចិត្តចូលបម្រើការងារជាមន្ត្រីក្របខណ្ឌរបស់ក្រសួងរ៉ែ និងថាមពល របស់ប្អូនៗទាំងអស់។ ជាពិសេស ឯកឧត្តម រដ្ឋលេខាធិការ បានមានប្រសាសន៍សង្កត់ធ្ងន់ថា ក្នុងនាមជាមន្ត្រីរាជការប្អូនៗត្រូវបំពេញតាមតួនាទីដែលថ្នាក់ដឹកនាំបានប្រគល់ជូន រក្សាភាពថ្លៃថ្នូរ រក្សាការសម្ងាត់ និងគោរពតាមច្បាប់សហលក្ខន្តិកៈមន្ត្រីរាជការ។ ឆ្លៀតក្នុងឱកាសនោះដែរ ប្អូនៗដែលជាសិក្ខាកាមមន្ត្រីក្របខណ្ឌថ្មីទាំង១០០នាក់ បានឡើងប្តេជ្ញាចិត្តបម្រើការងារជូនក្រសួងរ៉ែ និងថាមពល ក្នុងការអភិវឌ្ឍន៍លើវិស័យរ៉ែ ថាមពល និងប្រេងកាត អោយស្របតាមគោលនយោបាយរបស់រដ្ឋាភិបាល ដោយខិតខំបំពេញការងារតាមការចាត់តាំងរបស់ថ្នាក់ដឹកនាំ គោរពតាមច្បាប់សហលក្ខន្តិកៈមន្ត្រីរាជការ រក្សាភាពថ្លៃថ្នូរ រក្សាការសម្ងាត់ និងប្រកាន់ខ្ជាប់ក្រមសីលធម៌វិជ្ជាជីវៈជាមន្ត្រីរាជការ ក្នុងការបំពេញតួនាទីជាអ្នកផ្តល់សេវាសាធារណៈប្រកបដោយតម្លាភាព ដើម្បីបម្រើប្រជាពលរដ្ឋ និងប្រទេសជាតិ៕
ព្រហស្បតិ៍ 27 វិច្ឆិកា 2014  |  បានអាន 6426
អង្គភាពក្រោមឱវាទ
ថ្ងៃនេះ :
03041
ម្សិលមិញ :
04926
សរុប :
03265286
Flag Counter