រាជធានីភ្នំពេញ៖ នៅព្រឹកថ្ងៃទី០៣ ខែសីហា ឆ្នាំ២០១៤ ក្រសួងរ៉ែ និងថាមពល បានរៀបចំការប្រឡងជ្រើសរើសមន្ត្រីក្របខណ្ឌថ្មីឆ្នាំ២០១៤ នៅមណ្ឌលប្រឡងវិទ្យាស្ថានបច្ចេកវិទ្យាកម្ពុជាដែលមានប្រធានគណៈកម្មាការរៀបចំការប្រឡង និងតំណាងបេក្ខជនប្រឡង បានចូលរួមបើកវិញ្ញាសារប្រឡង ដើម្បីធ្វើយ៉ាងណាឲ្យការប្រឡងនេះ មានតម្លាភាព និងត្រឹមត្រូវ ១០០% ដោយមានការចូលរួមពីក្រសួងមុខងារសាធារណៈ និងបានជូនដំណឹងទៅអង្គភាពប្រឆាំងអំពើពុករលួយផងដែរ។
ការប្រឡងជ្រើសរើសមន្រ្តីក្របខណ្ឌថ្មីឆ្នាំ២០១៤នេះ មានបេក្ខជនចូលរួមប្រឡងចំនួន ៤៤៥នាក់ ក្នុងនោះមានស្រី ១២៨នាក់ និងមកពីបណ្តាខេត្តមានចំនួន ១០៦នាក់ ចែកជា១៦បន្ទប់ ។
ជាក់ស្តែងមុនការប្រលង ក្រសួងបានចាត់វិធានការ និងបានណែនាំដល់អនុរក្ស អំពីតួនាទីភារកិច្ចរៀងៗខ្លួន នៅពេលប្រឡង។ ប្រសិនបើមានបេក្ខជនណាម្នាក់ ត្រូវបានអនុរក្សចាប់បានប្រ៊ុយ៉ុង បេក្ខជននោះ នឹងត្រូវបញ្ឈប់មិនឲ្យចូលរួមប្រឡងភ្លាមៗ។ ចំណែកឯទូរស័ព្ទរបស់បេក្ខជនប្រលង ក្រសួងបានឲ្យអនុរក្សប្រមូលដាក់មួយកន្លែង ហើយហាមមិនឲ្យអនុរក្សនិយាយទូរស័ព្ទនៅពេលប្រឡងឡើយ។
គួរបញ្ជាក់ថា ការប្រលងជ្រើសរើសមន្ត្រីក្របខណ្ឌថ្មីឆ្នាំ២០១៤ របស់ក្រសួងរ៉ែ និងថាមពល បានប្រព្រឹត្តិទៅដោយរលូនរយៈពេល១ថ្ងៃ ដែលមុខវិជ្ជាប្រឡងរួមមាន៖ ពេលព្រឹកវិញ្ញាសាវប្បធម៌ទូទៅ និងវិញ្ញាសារភាសាអង់គ្លេស និងពេលរសៀលវិញ្ញាសារជំនាញបច្ចេកទេស៕
អាទិត្យ 03 សីហា 2014 | បានអាន 3118