រាជធានីភ្នំពេញ៖ សិក្ខាសាលាសេចក្តីព្រាងសារាចរ ស្តីពីសុវត្ថិភាពសម្រាប់ការរៀបចំស្ថានីយប្រេងឥន្ធនៈ បានប្រព្រឹត្តទៅរយៈពេល០១ថ្ងៃ នៅថ្ងៃទី០៧ ខែសីហា ឆ្នាំ២០១៤ ដែលចូលរួមក្នុងពិធីបើកក្រោមអធិបតីភាព ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងមានការចូលរួមពីមន្ត្រីក្រសួង មន្ទីរ ស្ថាប័ន មន្ត្រីពន្លត់អគ្គិសភ័យ អាជ្ញាធរមានសមត្ថកិច្ចពាក់ព័ន្ធគ្រប់រាជធានី-ខេត្ត និងភ្ញៀវកិត្តិយសជាអាជីវករក្រុមហ៊ុនប្រេង និងឧស្ម័ន និងម្ចាស់ស្ថានីយ៍ប្រេងនានាទាំងរាជធានី-ខេត្ត សរុបប្រមាណ១៨០នាក់។
ឯកឧត្តម ជៀប សួរ អគ្គនាយកប្រេងកាតនៃក្រសួងរ៉ែនិងថាមពលបានរាយការណ៍ពីសកម្មភាពក្នុងការរៀបចំបទដ្ឋានគតិយុត្តិក្រុមការងាររៀបចំ ដែលមានការសម្របសម្រួលដោយនាយកដ្ឋានបច្ចេកវិទ្យាប្រេងកាត គាំទ្រកិច្ចប្រតិបត្តិការ និងសន្តិសុខថាមពលនៃអគ្គនាយកដ្ឋានប្រេងកាត ក្នុងការរៀបចំសេចក្តីព្រាងសារាចរនេះ ដែលធ្វើឡើងដោយជួបប្រជុំពិភាក្សា ពិគ្រោះយោបល់ផ្ទៃក្នុងក្រុមការងារចំនួន២២លើក, ប្រជុំពិភាក្សាអំពីសុវត្ថិភាពស្ថានីយ៍ប្រេង និងឧស្ម័នឥន្ធនៈ ជាមួយអ្នកជំនាញបច្ចេកទេសពីក្រុមហ៊ុនចិន CNOOC នៅឆ្នាំ២០១៣ ចំនួន១លើក, ធ្វើទស្សនៈកិច្ចសិក្សាអំពីស្ថានីយ៍ប្រេង និងឧស្ម័នឥន្ធនៈចំនួន២លើក ជាមួយក្រុមហ៊ុនPTT នៃប្រទេសថៃចុងឆ្នាំ២០១៣ និងនៅប្រទេសចិនឆ្នាំ២០១៤, សិក្សាពីឯកសារស្តង់ដារស្ថានីយ៍ប្រេងឥន្ធនៈរបស់ប្រទេសសឹង្ហបុរី ហុងកុង អង់គ្លេស ចិន កាណាដា និងអូស្ត្រាលីជាដើម។ ឯកឧត្តមបានបន្តថា សិក្ខាសាលាពិគ្រោះយោបល់នេះ គឺជាឱកាសមួយដ៏សំខាន់ ក្នុងការផ្លាស់ប្តូរមតិយោបល់ និងចំណេះដឹង បទពិសោធន៍គ្នាទៅវិញទៅមក ដើម្បីអោយក្រុមការងារអាចធ្វើការកែលម្អរសេចក្តីព្រាងសារាចរស្តីពីសុវត្ថិភាពសម្រាប់ការរៀបចំស្ថានីយប្រេងឥន្ធនៈរបស់កម្ពុជា អោយកាន់តែមានភាពសុក្រឹត្យនិងអាចអនុវត្តបានទាំងអស់គ្នា។ លើសពីនេះ អគ្គនាយកដ្ឋានប្រេងកាត នឹងបន្តរៀបចំលិខិតបទដ្ឋានគតិយុត្តជាច្រើនទៀតដូចជា សុវត្ថិភាពក្នុងការទុកដាក់ប្រេង និងឧស្ម័នឥន្ទនៈ ការដឹកជញ្ជូន ការចែកចាយ និងការធ្វើអាជីវកម្ម សំដៅធ្វើយ៉ាងណាចូលរួមកាត់បន្ថយហានិភ័យនានាអោយបានជាអតិបរមា។
ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានគូសបញ្ជាក់ថា អណត្តិថ្មីនេះក្រសួងរ៉ែ និងថាមពល ទើបតែបង្កើតថ្មីមានគោលដៅយុទ្ធសាស្ត្រសំខាន់ៗចំនួន៥ និងបានធ្វើសមាហរណកម្មជាមួយអាជ្ញាធរប្រេងកាតកម្ពុជា ទៅលើការពង្រឹងអាជីវកម្មធនធានប្រេងកាត ឧស្ម័ន និងរ៉ែ ដែលជាគោលដៅដ៏សំខាន់មួយក្នុងការប្រែក្លាយអោយទៅជាប្រភពថាមពល និងកម្លាំងចលករថ្មីមួយយ៉ាងសំខាន់សម្រាប់ការជម្រុញវឌ្ឍនភាពសង្គម តាមរយៈការអភិវឌ្ឍន៍ធនធានមនុស្ស ការកសាងសមត្ថភាពប្រកួតប្រជែងរបស់កម្ពុជា និងការជម្រុញពិពិធកម្មសេដ្ឋកិច្ច និងឧស្សាហកម្ម ដែលជាមុខព្រួញយុទ្ធសាស្ត្រដ៏សំខាន់នៃយុទ្ធសាស្ត្រអភិវឌ្ឍន៍ជាតិរបស់រាជរដ្ឋាភិបាលកម្ពុជាក្នុងអណត្តិ២០១៣-២០១៨នេះ។
ឯកឧត្តមបានបន្តថា សព្វថ្ងៃនេះតម្រូវការប្រើប្រាស់ប្រេងឥន្ធនៈនិងឧស្ម័នឥន្ធនៈមានការកើនឡើងគួរអោយកត់សម្គាល់ ដូចនេះស្ថានីយ៍ប្រេងឥន្ធនៈដែលបម្រើអោយសេចក្តីត្រូវការរបស់អ្នកប្រើប្រាស់ទាំងអស់ ក៏មានការកើនឡើងជាបន្តបន្ទាប់ទាំងក្នុងរាជធានីភ្នំពេញ និងតាមបណ្ដោយខេត្ត ដែលជម្រុញអោយមានសកម្មភាពស្តុកទុក,ការដឹកជញ្ជូន,ការចែកចាយ និងការប្រើប្រាស់ប្រេង និងឧស្ម័នឥន្ធនៈគ្រប់ប្រភេទមានការកើនឡើងផងដែរ។
ដូចនេះការបង្កើតនូវបរិបទថ្មីមួយក្នុងវិស័យសេដ្ឋកិច្ច និងអភិវឌ្ឍសង្គម តាមរយៈការជំរុញក្នុងការរៀបចំបទដ្ឋានគិតយុត្តិ ក្រុមការងាររៀបចំ ដែលមានការសម្របសម្រួលដោយនាយកដ្ឋានបច្ចេកវិទ្យាប្រេងកាត គាំទ្រកិច្ចប្រតិបត្តិការនិងសន្តិសុខថាមពលនៃអគ្គនាយកដ្ឋានប្រេងកាត បានរៀបចំសេចក្តីព្រាងសារាចរស្តីពីសុវត្ថិភាពសម្រាប់ការរៀបចំស្ថានីយ៍ប្រេងឥន្ធនៈចប់រួចហើយ ដើម្បីលើកយកមកពិភាក្សានៅក្នុងអង្គសិក្ខាសាលានៅថ្ងៃនេះ។
ទទ្ទឹមនឹងនេះ ឆ្លងតាមការពិភាក្សាគ្នាយ៉ាងផុសផុលទៅលើសេចក្តីព្រាងសារាចរនេះ ក្រោមកិច្ចសម្របសម្រួលរបស់ ឯកឧត្តម ឌិត ទីណា រដ្ឋលេខាធិការ ក្រសួងរ៉ែ និងថាមពល អង្គសិក្ខាសាលាបានប្រព្រឹត្តទៅដោយរលូន តាមរយៈការធ្វើបទបង្ហាញរបស់នាយកដ្ឋានបច្ចេកវិទ្យាប្រេងកាត គាំទ្រកិច្ចប្រតិបត្តិការនិងសន្តិសុខថាមពលនៃអគ្គនាយកដ្ឋានប្រេងកាត ដើម្បីពិភាក្សាផ្លាស់ប្តូរយោបល់ និងកែប្រែ ទៅលើសេចក្តីព្រាងសារាចរនេះពីមន្ត្រីក្រសួង មន្ទីរ ស្ថាប័ន អាជ្ញាធរមានសមត្ថកិច្ចពាក់ព័ន្ធ និងភ្ញៀវកិត្តិយសមកពីក្រុមហ៊ុនប្រេង និងឧស្ម័ន និងអាជីវករម្ចាស់ស្ថានីយ៍ប្រេងនានាទាំងរាជធានី-ខេត្ត៕
ព្រហស្បតិ៍ 07 សីហា 2014 | បានអាន 5301
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
