បន្ទាប់ពីជ្រើសរើសបានបេក្ខជនជាប់ឆ្នោត០៣រូប របស់ក្រសួងរ៉ែ និងថាមពល ដើម្បីចូលរួមការប្រកួតប្រជែងបោះឆ្នោតជ្រីសរើសយុវជនឆ្នើមនៅក្នុងកម្មវិធីពន្លកសង្គម កាលពីព្រឹកថ្ងៃសៅរ៍ ទី១៦ ខែសីហា ឆ្នាំ២០១៤ ពិធីជួបជុំក្រុមយុវជនឆ្នើមក្រសួងរ៉ែ និងថាមពល បានប្រព្រឹត្តទៅនៅសាលប្រជុំត្បូងទទឹម ក្រោមវត្តមាន ឯកឧត្តម ឌិត ទីណា រដ្ឋលេខាធិការក្រសួងរ៉ែ និងថាមពល លោក ឈឹម សំណាង គ្រូបង្គោលនៃវេទិការនិយាយសាធារណៈ និងក្រុមយុវជនក្រសួងរ៉ែប្រមាណ៣០នាក់។
គោលបំណងនៃពិធីជួបជុំនេះ គឺដើម្បីពង្រឹងសមត្ថភាពក្រុមយុវជនឆ្នើមប្រចាំក្រសួង ក្នុងការត្រៀមរៀបចំខ្លួនទៅប្រកួតប្រជែងបោះឆ្នោតជ្រីសរើសយុវជនឆ្នើមនៅក្នុងកម្មវិធីពន្លកសង្គម ជាមួយក្រសួងដទៃទៀត ដែលទទួលបានការបង្ហាត់បង្ហាញពីគន្លឹះ និងរបៀបសិល្បៈនៃការនិយាយទៅកាន់វេទិការសាធារណៈ កុំអោយមានភាពភ័យខ្លាច ព្រមទាំងអោយក្រុមយុវជនឡើងអនុវត្តជាក់ស្តែងតាមរយៈការធ្វើបទបង្ហាញម្នាក់ម្តង។
ឆ្លៀតក្នុងឱកាសនេះ ឯកឧត្តម ឌិត ទីណា បានមានប្រសាសន៍ផ្តាំផ្ញើរដល់ក្រុមយុវជនក្រសួងរ៉ែ និងថាមពល ទាំងអស់អោយបន្តពង្រឹងស្មារតី និងសមត្ថភាពរបស់ខ្លួនបន្ថែមទៀត ទាំងសិល្បៈនៃការនិយាយ និងចំណេះដឹងទូទៅនៃការអភិវឌ្ឍន៍សង្គម ដើម្បីទទួលបានភាពជោគជ័យសម្រាប់ខ្លួនឯង និងក្រសួងទាំងមូល។
គូសបញ្ជាក់ថា បេក្ខជនជាប់ឆ្នោតទាំង០៣រូប របស់ក្រសួងរ៉ែ និងថាមពល នឹងទៅបន្តការចូលរួមការប្រកួតប្រជែងបោះឆ្នោតជ្រីសរើសយុវជនឆ្នើមនៅក្នុងកម្មវិធីពន្លកសង្គម ជាមួយក្រសួងដទៃទៀត រួមមាន ក្រសួងឧស្សាហកម្ម និងសិប្បកម្ម ក្រសួងផែនការ ក្រសួងអប់រំយុវជន និងកីឡា ក្រសួងសង្គមកិច្ចអតីតយុទ្ធជន និងយុវនីតិសម្បទា នៅថ្ងៃទី ២៤ ខែសីហា ឆ្នាំ២០១៤ខាងមុខនេះ។
សៅរ៍ 16 សីហា 2014 | បានអាន 1429
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
