រាជធានីភ្នំពញ៖ នៅថ្ងៃទី១៥ ខែតុលា ឆ្នាំ២០១៤ មន្ត្រីរាជការគ្រប់ស្ថាប័ន នៃរាជរដ្ឋាភិបាលកម្ពុជា បានអញ្ជើញគោរពព្រះវិញ្ញាណក្ខន្ធ ព្រះបរមរតនកោដ្ឋ គម្រប់ខួប២ឆ្នាំ នៅព្រះបរមរូប សម្តេចព្រះនរោត្តមសីហនុ ខាងកើតវិមានឯករាជ្យ ដើម្បីតបស្នងព្រះមហាករុណាទិគុណដ៏ថ្លៃថ្លា ឧត្តុង្គឧត្តម វិសេសវិសាល របស់ ព្រះបរមរតនកោដ្ឋ ព្រះករុណា ព្រះបាទសម្តេច ព្រះនរោត្តមសីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ដែលបានលះបង់ព្រះកាយពល ព្រះបញ្ញាញាណ ក្នុងព្រះរាជសកម្មភាព ដើម្បីបុព្វហេតុឯករាជ្យជាតិ បូរណភាពទឹកដី ផ្សះផ្សាជាតិ បង្រួបបង្រួមជាតិ និងអភិវឌ្ឍលើគ្រប់វិស័យ។
នាឱកាសដ៏ឧត្តុង្គឧត្តមនេះ បន្ទាប់ពីគណៈប្រតិភូជាន់ខ្ពស់ក្រសួងរ៉ែ និងថាមពល ដឹកនាំដោយ ឯកឧត្តម អ៊ិត ប្រាំង រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានអញ្ជើញចូលរួមគោរពព្រះវិញ្ញាណក្ខន្ធ នៅព្រះបរមរូបព្រះបរមរតនកោដ្ឋ នៅមណ្ឌលសួនច្បារខាងកើតវិមានឯករាជ្យរួចមក ថ្នាក់ដឹកនាំជាន់ខ្ពស់ និងមន្ត្រីរាជការគ្រប់ជាន់ថ្នាក់ក្រសួង បានចូលរួមរៀបចំព្រះរាជពិធីគោរពព្រះវិញ្ញាណក្ខន្ធ ព្រះបរមរតនកោដ្ឋ នៅទីស្តីការក្រសួង ដើម្បីតបស្នងព្រះមហាករុណាទិគុណដ៏ថ្លៃថ្លា ឧត្តុង្គឧត្តម វិសេសវិសាល របស់ ព្រះបរមរតនកោដ្ឋ។
គួររំលឹកថា ព្រះករុណា ព្រះបាទសម្តេច ព្រះនរោត្តមសីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះអង្គប្រសូតនៅថ្ងៃអង្គារ ១១កើត ខែកក្តិក ឆ្នាំច ចត្វាស័ក ព.ស ២៤៦៥ ត្រូវនឹងថ្ងៃទី៣១ ខែតុលា ឆ្នាំ១៩២២។ ព្រះអង្គបានយាងចូលព្រះទីវង្គតនៅថ្ងៃចន្ទ ១៥រោច ខែភទ្របទ ឆ្នាំរោង ចត្វាស័ក ព.ស ២៥៥៦ ត្រូវនឹងថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ៩០ព្រះវស្សា ដោយទទួលព្រះបរមបច្ឆាមរណនាម “ ព្រះបរមរតនកោដ្ឋ”។
ពុធ 15 តុលា 2014 | បានអាន 2507
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
