រាជធានីភ្នំពេញ៖ នៅទីស្តីការក្រសួង នារសៀលថ្ងៃទី២០ ខែតុលា ឆ្នាំ២០១៤ ក្រោមវត្តមានដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងលោកជំទាវ BU JIANGUO ឯកអគ្គរដ្ឋទូត នៃសាធារណៈរដ្ឋប្រជាមានិតចិនប្រចាំកម្ពុជា បានរៀបចំពិធីប្រគល់-ទទួលសំភារៈការិយាល័យ ដែលជាអំណោយដ៏ថ្លៃថ្លារបស់លោកជំទាវឯកអគ្គរដ្ឋទូតចិនប្រចាំកម្ពុជា និងក្រុមហ៊ុន Cambodia Tatay Hydropower Limited ដោយមានការចូលរួមពី មន្ត្រីជាន់ខ្ពស់នៃក្រសួងរ៉ែ និងថាមពល និងតំណាងក្រុមហ៊ុន CHMC ជាច្រើននាក់ទៀត។
នៅក្នុងឱកាសនោះ លោកជំទាវ BU JIANGUO ឯកអគ្គរដ្ឋទូត នៃសាធារណៈរដ្ឋប្រជាមានិតចិនប្រចាំកម្ពុជា បានមានប្រសាសន៍ថា ក្រសួងរ៉ែ និងថាមពលគឺជាក្រសួងទើបនឹងបង្កើតថ្មី និងមានតួនាទីធំៗចំនួន៣ រួមមានវិស័យរ៉ែ ថាមពល និង ប្រេងកាត ដែលកំពុងមានតម្រូវការជាចាំបាច់នូវសំភារៈប្រើប្រាស់ការិយាល័យ ក្នុងការអនុវត្តការងារប្រចាំថ្ងៃ។ ហើយក្រសួងក៏មានទំនាក់ទំនងជាមួយក្រុមហ៊ុនចិនមួយចំនួនក្នុងការវិនិយោគលើវិស័យអាទិភាពនានា ដែលជម្រុញអោយក្រុមហ៊ុន CHMC មើលឃើញពីភាពខ្វះខាតរបស់ក្រសួង ទើបសម្រេចឧបត្ថម្ភនូវសំភារៈការិយាល័យមួយចំនួនដល់ក្រសួង តាមរយៈស្ថានទូតចិនប្រចាំកម្ពុជា។
ទទ្ទឹមនឹងនេះ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានថ្លែងថា វិស័យអគ្គិសនីមានក្រុមហ៊ុនចិនមួយចំនួនកំពុងអនុវត្តគម្រោងឥណទានពង្រីកបណ្តាញអគ្គិសនីភាវូបនីយកម្មជនបទ ២២គីឡូវ៉ាត់ ជំហានទី២ នៅក្នុងខេត្តកំពង់ឆ្នាំង, ពោធិសាត់, កោះកុង, កណ្តាល, កំពង់ចាម, ព្រះសីហនុ, សៀមរាប និងក្រចេះ។
ឯកឧត្តមរដ្ឋមន្ត្រី បានបន្តលើកទឹកចិត្ត និងជួយគាំទ្រយ៉ាងពេញទំហឹងដល់វិនិយោគចិនដែលមកវិនិយោគវារីអគ្គិសនីនៅកម្ពុជា រួមមាន គម្រោងវារីអគ្គិសនីគីរីរម្យ១, កំចាយ, គីរីរម្យ៣, ស្ទឹងតាតៃ, ស្ទឹងអាតៃ, ស្ទឹងឬស្សីជ្រុំក្រោម ជាពិសេស ចិនបានផ្តល់ជំនួយឧបត្ថម្ភដ៏ច្រើនលើសលុប ដែលអាចចាត់ទុកបានថាជាចំណាត់ថ្នាក់លេខ១។ ជាក់ស្តែង កិច្ចសហការរវាងក្រសួងក្រសួងរ៉ែនិងថាមពល ជាមួយក្រុមហ៊ុន CHMC ក៏បានប្រព្រឹត្តទៅយ៉ាងល្អប្រសើរដែលជាកត្តាជំរុញឲ្យការអភិវឌ្ឍគម្រោងវារីអគ្គិសនីស្ទឹងតាតៃ មានអានុភាពតម្លើង ២៤៦ មេហ្គាវ៉ាត់ អាចផលិតថាមពលជាមធ្យមប្រចាំឆ្នាំ ៨៥៨ លានគីឡូវ៉ាត់ម៉ោង សម្រេចបានមុនផែនការគ្រោងទុក ដែលរហូតមកដល់បច្ចុប្បន្ននេះ កំពុងដាក់ឲ្យដំណើរការសាកល្បងនូវម៉ាស៊ីនទាំងបីគ្រឿងផងដែរ។
ឯកឧត្តមរដ្ឋមន្ត្រីបានបន្ថែមថា ប្រទេសចិនក៏ជាប្រទេសនាំមុខគេក្នុងការចូលរួមចំណែកស្តារ និងអភវិឌ្ឍន៍ប្រទេសកម្ពុជាលើគ្រប់វិស័យ ដូចជា ហេដ្ឋារចនាសម្ព័ន្ធ ផ្លូវ ស្ពាន និងវិស័យអគ្គិសនី ចិនបានជួយលើមូលដ្ឋានអគ្គិសនីសំខាន់ៗ ជាបន្តបន្ទាប់។ នាឱកាសនោះ ឯកឧត្តមរដ្ឋមន្ត្រី បានថ្លែងអំណរគុណ លោកជំទាវឯកអគ្គរដ្ឋទូតចិនប្រចាំកម្ពុជា និងក្រុមហ៊ុន CHMC ដែលបានផ្តល់សំភារៈការិយាល័យមួយចំនួនដល់ក្រសួងរ៉ែ និងថាមពល ចំពេលដែលក្រសួងកំពុងតែខ្វះខាតនូវសំភារៈប្រើប្រាស់ក្នុងការិយាល័យនាពេលបច្ចុប្បន្ននេះ។ សម្ភារៈទាំងនោះរួមមាន ម៉ាស៊ីនកុំព្យូទ័រលើតុចំនួន២០គ្រឿង, ម៉ាស៊ីនព្រីនធ័រចំនួន២០គ្រឿង, ម៉ាស៊ីនកុំព្យួទ័រព្យួរដៃចំនួន១០គ្រឿង និងម៉ាស៊ីនហ្វូតូចំនួន០១គ្រឿង៕
ច័ន្ទ 20 តុលា 2014 | បានអាន 2426
អង្គភាពក្រោមឱវាទ
ឯកសារថ្មីៗ
មណ្ឌលព័ត៍មាន
