ទីស្តីការក្រសួង៖ ក្នុងជំនួបពិភាក្សាការងារជាមួយឯកឧត្តម Philip Calvert ឯកអគ្គរដ្ឋទូតនៃប្រទេសកាណាដាប្រចាំព្រះរាជាណាចក្រកម្ពុជា (មាននិវេសនដ្ឋាននៅទីក្រុងបាងកក) នៅ ទីស្តីការក្រសួងរ៉ែ និងថាមពលនាព្រឹកថ្ងៃទី ៣០ ខែ មិថុនា ឆ្នាំ២០១៤ នេះ ឯកឧត្តមរដ្ឋមន្ត្រី ស៊ុយ សែម បានជម្រាបជូនអំពីវិស័យទាំង បី ដែលក្រសួងរ៉ែ និងថាមពល ទទួលអនុវត្តគឺ វិស័យថាមពល វិស័យរ៉ែ និងប្រេងកាត ឧស្ម័ន។ ឯកឧត្តមរដ្ឋមន្ត្រី បានលើកឡើងពីការវិវត្តពីដំណាក់កាលចាប់ផ្តើម រហូតមកទល់ពេលបច្ចុប្បន្ននេះ ហើយបានគូសបញ្ចាក់អំពីការយកចិត្តទុកដាក់គិតគូររបស់រាជរដ្ឋាភិបាលដល់កិច្ចការពារបរិស្ថាន និងការប្រែប្រួលអាកាសធាតុនៅគ្រប់ដំណាក់កាលនៃការអភិវឌ្ឍន៏របស់វិស័យទាំងបី ដោយតំរូវអោយក្រុមហ៊ុនវិនិយោគធ្វើការសិក្សា EIA និងត្រូវតែទទួលបានការអនុម័តពីក្រសួងបរិស្ថានទើបអាចអនុវត្តគម្រោងបាន។ ក្នុងឱកាសនេះ ឯកឧត្តមរដ្ឋមន្ត្រី ក៏បានលើកជាសំណូមពរដល់ភាគីកាណាដាឲ្យជួយលើផ្នែកកសាងសេចក្តីព្រាងច្បាប់ស្តីពីប្រេងកាត ជួយបណ្តុះបណ្តាលធនធានមនុស្ស ទាំងវគ្គរយៈពេលខ្លី និងវែង ។ ជាកិច្ចឆ្លើយ តបឯកឧត្តម ឯកអគ្គរដ្ឋទូត Philip Calvert បានថ្លែងអំណរគុណចំពោះឯកឧត្តមរដ្ឋមន្ត្រីដែលបានផ្តលពេលវេលាដ៏មានតម្លៃទទួលជួប ហើយបានពន្យល់ បកស្រាយនូវសំនួររបស់លោក យ៉ាងក្បោះក្បាយ ហើយចំពោះសំណូមពររបស់កម្ពុជា ឯកឧត្តមសូមយកទៅពិនិត្យ និងធ្វើការឆ្លើយតបជាក្រោយ។
ច័ន្ទ 30 មិថុនា 2014 | បានអាន 1764