សកម្មភាពផ្នែកអាប់ស្រ្ទីម

ការអនុញ្ញាត​ឱ្យពិនិត្យមើល​និងទិញ​ទិន្នន័យប្រេងកាតដែនគោក

ទិដ្ឋភាពទូទៅ

ការអនុញ្ញាត​ឱ្យ​ពិនិត្យមើលនិងទិញទិន្នន័យប្រេងកាតដែនគោកកម្ពុជា ជាសេវាផ្តល់ឱ្យអ្នកដែលមានចំណាប់អារម្មណ៍ប្រើប្រាស់ទិន្នន័យសម្រាប់ធ្វើការវាយតម្លៃ​សក្តានុពលធនធានប្រេងកាត ជាលក្ខណៈ​បច្ចេកទេសនិងពាណិជ្ជកម្ម។ ទិន្នន័យនេះ គ្របដណ្តប់លើអាងសិលាកម្ទេចកំណកកើតនៅអាយុកាលប៉ាឡេអូហ្សូអ៊ិក (Paleozoic) និងមេសូហ្សូអ៊ិក (Mesozoic) ដែលមានសក្តានុពលកកើតនិងរក្សាទុកប្រេងនិងឧស្ម័នធម្មជាតិដ៏ច្រើន។ អាងសិលាកម្ទេចកំណដែលមានសក្តានុពលជាងគេ​ គឺអាងទន្លេសាប ដែលជាតំបន់គោលដៅដ៏មានសក្តានុពលសម្រាប់ការស្វែងរុករកបន្ថែម។ ផ្អែកលើទិន្នន័យដែលមានស្រាប់​ ប្លុកប្រេងកាតដែលមានសក្តានុពលសម្រាប់ការស្វែងរុករកនៅដែនគោក មានទីតាំងនៅជុំវិញបឹងទន្លេសាប ដែលរួមមាន ប្លុក XI, XII, XIII, XIV, XV, XVI និងប្លុក XVII។

អ្នកដាក់ពាក្យស្នើសុំ​អាចពិនិត្យមើលនិងទិញកញ្ចប់​ទិន្នន័យដូចជា ទិន្នន័យក្រាវីធីនិងម៉ាញ៉េទិក(Airborne Gravity and Magnetic Data) ទំហំ ៦០,៩០០ គម២ លើអាងសិលាកម្ទេចកំណទន្លេសាបនិងមេគង្គ ទិន្នន័យ2Dស៊ីស្មិក ២,០៨៥ គម (Multi-Client Data) ទិន្នន័យក្រាវីធីនិងម៉ាញ៉េទិកនៃប្លុក XV ទំហំ ៦,១៧៦ គម២ ទិន្នន័យ2Dស៊ីស្មិកនៃប្លុក XV ប្រវែង ៦០៧ គម និង​ទិន្នន័យ2Dស៊ីស្មិកនៃប្លុក XVII ប្រវែង ២៩៣ គម។ ការអនុញ្ញាតឱ្យពិនិត្យមើលនិងការទិញ​កញ្ចប់ទិន្នន័យប្រេងកាតដែនគោក ស្ថិតនៅក្រោមការគ្រប់គ្រងរបស់​ក្រសួងរ៉ែនិងថាមពល។

ដំណើរការដាក់ពាក្យ​ស្នើសុំ

ដើម្បី​ទទួលបានការអនុញ្ញាត​ពិនិត្យមើលឬទិញទិន្នន័យប្រេងកាត អ្នកដាក់ពាក្យស្នើសុំ​ត្រូវ​​ដាក់សំណើនៅការិយាល័យច្រកចេញ-ចូលតែមួយ  របស់​ក្រសួងរ៉ែនិងថាមពល ឬតាមរយៈអ៊ីមែល របស់ក្រសួងរ៉ែនិងថាមពល រៀងរាល់​ម៉ោងធ្វើការ។ ចាប់ពីកាលបរិច្ឆេទដែលក្រសួងរ៉ែនិងថាមពលទទួលបានសំណើពេញលេញ អ្នកស្នើ​សុំនឹងទទួលបានការឆ្លើយតបជាលាយលក្ខណ៍អក្សរ​ (ឯកភាព ឬបដិសេធ) ក្នុងរយៈពេលដូចខាងក្រោម៖

• ១៤ ថ្ងៃធ្វើការ សម្រាប់ការពិនិត្យមើលទិន្នន័យ
• ៣០ ថ្ងៃធ្វើការ សម្រាប់ការទិញកញ្ចប់ទិន្នន័យ

តម្លៃ​សេវានិងកាតព្វកិច្ចហិរញ្ញវត្ថុ

តម្លៃ​សេវា៖

• ការពិនិត្យមើលទិន្នន័យ៖ ២,0៥0,000 រៀល ក្នុងមួយប្លុកដែនគោក ក្នុងមួយថ្ងៃ
• ការទិញកញ្ចប់ទិន្នន័យ៖ ២0,៥00,000 រៀល ក្នុងមួយប្លុកដែនគោក

សម្រាប់ព័ត៌មានលម្អិតបន្ថែមទាក់ទងនឹងតម្លៃសេវា សូមពិនិត្យមើលប្រកាសអន្តរក្រសួង លេខ ៤៨៩ សហវ.ប្រក​.អទច ចុះថ្ងៃទី២៤ ខែកក្កដា ឆ្នាំ២០២៤ ដែលចេញដោយក្រសួងរ៉ែនិងថាមពល និងក្រសួងសេដ្ឋកិច្ចនិងហិរញ្ញវត្ថុ។
 

ការអនុញ្ញាតឱ្យពិនិត្យមើលនិងទិញទិន្នន័យប្រេងកាតដែនសមុទ្រ

ទិដ្ឋភាពទូទៅ

ការអនុញ្ញាតឱ្យពិនិត្យមើលនិងទិញទិន្នន័យប្រេងកាតដែនសមុទ្រកម្ពុជា ជាសេវាផ្តល់ឱ្យអ្នកដែលមានចំណាប់អារម្មណ៍ប្រើប្រាស់ទិន្នន័យសម្រាប់ធ្វើការវាយតម្លៃ​សក្តានុពលធនធានប្រេងកាតនៅក្នុងអាងសិលាកម្ទេចកំណដែនសមុទ្រកម្ពុជា។​ ក្រុមហ៊ុនប្រេងកាតអន្តរជាតិមួយចំនួនបានសិក្សាស្វែងរុក​រក​ប្រេងកាត​នៅ​ ដែនសមុទ្រ​កម្ពុជា និងបានបញ្ជាក់ថា កម្ពុជា​មានសក្តានុពលធនធានប្រេងកាត តាមរយៈការរកឃើញ​​​ប្រព័ន្ធកកើត​ប្រេងកាត (Petroleum System)​។ ប្លុកប្រេងកាតដែនសមុទ្រដែលមានសក្តានុពល រួមមានប្លុក A, B, C, D, E, និងប្លុក F។

ប្លុក A ជាប្លុកប្រេងកាត​អាទិភាពមួយសម្រាប់ការអភិវឌ្ឍន៍ឡើងវិញ ដោយមាន​ឋបនភណ្ឌដែលមានស្រាប់ រួមមានផ្លាតហ្វមនិងនាវាផលិតកម្ម។ រហូតមកដល់បច្ចុប្បន្ន អណ្តូងស្វែងរុករកចំនួន២៥ ត្រូវបានខួងនៅក្នុងប្លុកនេះ ដែលក្នុងនោះមាន ២១អណ្តូង(ឬត្រូវជា ៨៤%)មានប្រេងនិងឧស្ម័ន។ អណ្តូងចំនួន ៧ ត្រូវបានកត់ត្រាថាមានស្រទាប់ប្រេងសុទ្ធលើសពី ៥០ហ្វីត។ បន្ថែមលើនេះ អ្នកដាក់ពាក្យ​ស្នើសុំ អាចពិនិត្យមើលនិងទិញទិន្នន័យប្រេងកាតដែនសមុទ្រ ដែលមានដូចជា ទិន្នន័យអណ្តូងស្វែងរុករកនិងវាយតម្លៃ ៣៤អណ្តូង អណ្តូងអភិវឌ្ឍនិងផលិតកម្ម ៦អណ្តូង ទិន្នន័យ2Dស៊ីស្មិក ចំនួន ២៣,៥១៣ គម និងទិន្នន័យ3D​ស៊ីស្មិក ចំនួន ៧,១៧៧ គម២។ ការអនុញ្ញាតឱ្យពិនិត្យមើលនិងទិញ​កញ្ចប់ទិន្នន័យប្រេងកាតដែនសមុទ្រ ស្ថិតនៅក្រោមការគ្រប់គ្រងរបស់​ក្រសួងរ៉ែនិងថាមពល ។

ដំណើរការដាក់ពាក្យ​ស្នើសុំ

ដើម្បី​ទទួលបានការអនុញ្ញាត​ពិនិត្យមើលឬទិញទិន្នន័យប្រេងកាត អ្នកដាក់ពាក្យស្នើសុំ​ត្រូវ​​ដាក់សំណើ​នៅការិយាល័យច្រកចេញ-ចូលតែមួយ របស់​ក្រសួងរ៉ែនិងថាមពល ឬតាមរយៈអ៊ីមែល របស់ក្រសួងរ៉ែនិងថាមពល រៀងរាល់​ម៉ោងធ្វើការ។ ចាប់ពីកាលបរិច្ឆេទដែលក្រសួងរ៉ែនិងថាមពលទទួលបានសំណើពេញលេញ អ្នកស្នើ​សុំនឹងទទួលបានការឆ្លើយតបជាលាយលក្ខណ៍អក្សរ​ (ឯកភាព ឬបដិសេធ) ក្នុងរយៈពេលដូចខាងក្រោម៖

• ១៤ ថ្ងៃធ្វើការ សម្រាប់ការពិនិត្យមើលទិន្នន័យ
• ៣០ ថ្ងៃធ្វើការ សម្រាប់ការទិញកញ្ចប់ទិន្នន័យ

តម្លៃសេវានិងកាតព្វកិច្ចហិរញ្ញវត្ថុ

តម្លៃ​សេវា៖

• ការពិនិត្យមើលទិន្នន័យ៖ ៤១,០០០,០០០ រៀល ក្នុងមួយប្លុកដែនសមុទ្រ ក្នុងមួយថ្ងៃ
• ការទិញកញ្ចប់ទិន្នន័យ៖ ៤១០,០០០,០០០ រៀល ក្នុងមួយប្លុកដែនសមុទ្រ
   

សម្រាប់ព័ត៌មានលម្អិតបន្ថែមទាក់ទងនឹងតម្លៃ​ សូមពិនិត្យមើលប្រកាសអន្តរក្រសួង លេខ ៤៨៩ សហវ.ប្រក​.អទច ចុះថ្ងៃទី២៤ ខែ​កក្កដា ឆ្នាំ២០២៤ ដែលចេញដោយក្រសួងរ៉ែនិងថាមពល និងក្រសួងសេដ្ឋកិច្ច និងហិរញ្ញវត្ថុ។
 

លិខិតអនុញ្ញាតសម្រាប់បែបបទ​នាំចូល-នាំចេញសំណាកគំរូប្រេងកាត

ទិដ្ឋភាពទូទៅ

លិខិតអនុញ្ញាតសម្រាប់បែបបទ​នាំចូលនិងនាំចេញសំណាកគំរូប្រេងកាត ជាលិខិតអនុញ្ញាតផ្តល់ឱ្យ​អ្នកដាក់ពាក្យស្នើសុំ​ សម្រាប់​​​​គាំទ្រ​ដល់សកម្មភាពសិក្សាស្វែងរុករកនិងផលិតកម្មប្រេងកាត​ នៅក្នុងព្រះរាជាណាចក្រកម្ពុជា។ លិខិតអនុញ្ញាតនេះ ផ្តល់សម្រាប់​​ការសិក្សាបច្ចេកទេសនានាដែលមានសារៈសំខាន់ដល់​ប្រតិបត្តិការប្រេងកាត រួមមាន​ការវិភាគនៅមន្ទីរពិសោធន៍ ការវាយតម្លៃជម្រកប្រេងកាត និងការធ្វើតេស្តគុណភាព ដែលអាចអនុវត្តបាន​ទាំងក្នុងប្រទេសឬក្រៅប្រទេស​ដែលមានមន្ទីរពិសោធន៍ស្តង់ដារ។

សំណាកគំរូប្រេងកាត រួមមានសំណាកសិលាគំរូ ប្រេងឆៅ ឧស្ម័នធម្មជាតិ Condensate ទឹកពីអាងជម្រកប្រេងកាត ផលិតផលប្រេងកាត និងសារ​ធាតុពាក់ព័ន្ធ ដែលទទួលបានក្នុងដំណាក់កាលសិក្សាស្វែងរុករក វាយតម្លៃ អភិវឌ្ឍ និងផលិតកម្ម។ សំណាកគំរូទាំងនេះ ត្រូវបានកំណត់យ៉ាងតឹងរឹងសម្រាប់តែការសិក្សាស្រាវជ្រាវ ការវិភាគ និងការវាយតម្លៃបច្ចេកទេសប៉ុណ្ណោះ និងមិនអនុញ្ញាតឱ្យប្រើប្រាស់ក្នុងគោលបំណងពាណិជ្ជកម្មឡើយ។

ដំណើរការដាក់ពាក្យ​ស្នើសុំ

អ្នកដាក់ពាក្យស្នើសុំ​ត្រូវ​​ដាក់សំណើនៅការិយាល័យច្រកចេញ-ចូលតែមួយ របស់​ក្រសួងរ៉ែនិងថាមពល ឬតាមរយៈអ៊ីមែល របស់ក្រសួងរ៉ែនិងថាមពល រៀងរាល់​ម៉ោងធ្វើការ។ ចាប់ពីកាលបរិច្ឆេទដែលក្រសួងរ៉ែនិងថាមពលទទួលបានសំណើពេញលេញ អ្នកស្នើ​សុំនឹងទទួលបានការឆ្លើយតបជាលាយលក្ខណ៍អក្សរ​ (ឯកភាព ឬបដិសេធ) ក្នុងរយៈពេល១៥ថ្ងៃ នៃថ្ងៃធ្វើការ។

អ្នកដាក់ពាក្យស្នើសុំ​អាចស្នើសុំលិខិតអនុញ្ញាតសម្រាប់បែបបទ​​នាំចូលសំណាកគំរូប្រេងកាតសម្រាប់ការវិភាគឯកទេសដែលមាននៅប្រទេស​កម្ពុជា ឬនាំចេញសំណាកគំរូសម្រាប់ការវិភាគ​នៅមន្ទីរពិសោធន៍នៅក្រៅប្រទេស​។ ទិន្នន័យនិងលទ្ធផលទាំងអស់ដែលទទួលបានពីការពិសោធន៍នេះ ស្ថិតនៅក្រោមសមត្ថកិច្ចគ្រប់គ្រង​​របស់ក្រសួងរ៉ែនិងថាមពល។ ព័ត៌មាន ឬឯកសារចាំបាច់ សម្រាប់នីតិវិធីនាំចូលនិងនាំចេញ មានដូចខាងក្រោម៖

• បញ្ជីរាយនាមសំណាកគំរូ​
• កាលបរិច្ឆេទនៃការដឹកជញ្ជូន
• រូបថត​សំណាកគំរូដែលមានវាយ​ត្រាផ្លូវការរបស់ក្រុមហ៊ុន(ប្រសិនបើមាន)​ និង
• ផែនាំចេញ ឬនាំចូល។

តម្លៃសេវានិងកាតព្វកិច្ចហិរញ្ញវត្ថុ

ថ្លៃសេវា៖ ២,០៥០,០០០ រៀលក្នុងមួយប្រតិបត្តិការ

សម្រាប់ព័ត៌មានលម្អិតបន្ថែមទាក់ទងនឹងតម្លៃ​ សូមពិនិត្យមើលប្រកាសអន្តរក្រសួង ៤៨៩ សហវ.ប្រក​.អទច ចុះថ្ងៃទី២៤ ខែ​កក្កដា ឆ្នាំ២០២៤ ដែលចេញដោយក្រសួងរ៉ែនិងថាមពល និងក្រសួងសេដ្ឋកិច្ច និងហិរញ្ញវត្ថុ។