លិខិតអនុញ្ញាតបុរេសនា

ទិដ្ឋភាពទូទៅ

បុរេសនា(Prospecting) គឺជាការវាយតម្លៃបឋមអំពីធនធានរ៉ែ ដោយប្រើប្រាស់ឧបករណ៍សាមញ្ញ និងមានផលប៉ះពាល់តិចតួចបំផុតលើផ្ទៃដី ដើម្បីកំណត់អត្តសញ្ញាណវត្តមាននៃធនធានរ៉ែដែលមានសក្តានុពលពាណិជ្ជកម្ម ដែលជាមូលដ្ឋានគ្រឹះសម្រាប់ការស្នើសុំអាជ្ញាប័ណ្ណរុករក (exploration licenses) និងអាជ្ញាប័ណ្ណអាជីវកម្មរ៉ែ (mining licenses) ជាបន្តបន្ទាប់.

នីតិវិធីនៃការដាក់ពាក្យ

កាតព្វកិច្ចរបស់អ្នកដាក់ពាក្យស្នើសុំ

• អនុវត្តសកម្មភាពតែនៅក្នុងតំបន់ដែលបានអនុញ្ញាត និងអនុលោមតាមច្បាប់នៃព្រះរាជាណាចក្រកម្ពុជា។
• ជូនដំណឹងដល់អាជ្ញាធរដែនដីពាក់ព័ន្ធ មុនពេលចាប់ផ្តើមប្រតិបត្តិការ។
• ធ្វើការសិក្សាលើលក្ខខណ្ឌភូមិសាស្ត្រ និងភូគព្ភសាស្ត្រ ដោយសហការជាមួយនាយកដ្ឋានភូគព្ភសាស្ត្រ និងធនធានរ៉ែ ។
• សិក្សាការប្រើប្រាស់ដីធ្លី និងវាយតម្លៃផលប៉ះពាល់សេដ្ឋកិច្ច និងសង្គមដែលមានសក្តានុពលនៅក្នុងតំបន់អនុញ្ញាត។
• ប្រសិនបើគំរូត្រូវបានធ្វើតេស្តនៅបរទេស ត្រូវអនុវត្តតាមជំហាននានាក្រោម "ស្ថានភាពនៃការស្នើសុំវិញ្ញាបនបត្រគំរូ" និងទទួលបានការយល់ព្រមជាមុនពីក្រសួងរ៉ែ និងថាមពល។
• ដាក់របាយការណ៍ចុងក្រោយស្តីពីលទ្ធផលគម្រោង មិនលើសពី ១៥ ថ្ងៃ បន្ទាប់ពីលិខិតអនុញ្ញាតផុតកំណត់។

សុពលភាពលិខិតអនុញ្ញាត

លិខិតអនុញ្ញាតបុរេសនា មានសុពលភាពរយៈពេល ៦ (ប្រាំមួយ) ខែ ជាមួយនឹងការបន្តតែម្ដងគត់រយៈពេល ៣ (បី) ខែ។ ការបន្តសុពលភាពនេះ គឺអាស្រ័យលើការបំពេញកាតព្វកិច្ចទាំងអស់របស់អ្នកដាក់ពាក្យ និងការដាក់របាយការណ៍គម្រោងចុងក្រោយសម្រាប់ការវាយតម្លៃ។

កាតព្វកិច្ចបង់ថ្លៃសេវា និងហិរញ្ញវត្ថុ

អ្នកដាក់ពាក្យ ត្រូវបង់ថ្លៃសេវារដ្ឋបាល និងថ្លៃសេវាលិខិតអនុញ្ញាតបុរេសនាដែលបានកំណត់ ដូចមានចែងលម្អិតក្នុងប្រកាសអន្តរក្រសួងលេខ ៤៨៩ (ថ្ងៃទី ២៤ ខែកក្កដា ឆ្នាំ ២០២៤)  ដែលចេញដោយក្រសួងរ៉ែ និងថាមពល និងក្រសួងសេដ្ឋកិច្ច និងហិរញ្ញវត្ថុ។