សារឯកឧត្តមរដ្ឋមន្រ្តី

វឌ្ឍនភាព​របស់​ប្រទេស​កម្ពុជា​ត្រូវ​បាន​កសាងឡើង​ដោយ​កម្លាំង និង​ស្ថិរភាព​នៃ​ការ​ដឹកនាំ​របស់​ប្រមុខនៃរាជរដ្ឋាភិបាលកម្ពុជា។ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រទេសយើងទទួលបាននូវសុខសន្តិភាព ស្ថិរភាព និងសណ្តាប់ធ្នាប់ ដែលជាកត្តាចាំបាច់មួយក្នុងការកសាងប្រព័ន្ធនានារបស់ជាតិ។ ថ្ងៃនេះ សម្តេចមហាបវរធិបតី ហ៊ុន ម៉ាណែត បានបន្តការងារនេះ ដោយមានចក្ខុវិស័យច្បាស់លាស់ សម្រាប់អនាគតកម្ពុជាប្រកបដោយបរិយាបន្ន។

ក្នុងអាណត្តិទី៧នៃរាជរដ្ឋាភិបាល ក្រសួងរ៉ែ និងថាមពលបាននិងកំពុងបន្តបេសកកម្មរបស់ខ្លួន ដោយយកមនុស្សជាកត្តាស្នូលនៃរាល់គោលនយោបាយ ដើម្បីកសាងមូលដ្ឋានគ្រឹះមួយសម្រាប់កំណើនរយៈពេលវែង។ គោលដៅរបស់យើងគឺ បំពេញតម្រូវការនាពេលបច្ចុប្បន្នប្រកបដោយការទទួលខុសត្រូវខ្ពស់ និងត្រូវធានាអនាគតសម្រាប់ប្រជាពលរដ្ឋរបស់យើង សហគមន៍របស់យើង និងបរិស្ថានរបស់យើង។

ក្នុងអាណត្តិទី៧នៃរាជរដ្ឋាភិបាល ក្រសួងរ៉ែ និងថាមពលបាននិងកំពុងបន្តបេសកកម្មរបស់ខ្លួន ដោយយកមនុស្សជាកត្តាស្នូលនៃរាល់គោលនយោបាយ ដើម្បីកសាងមូលដ្ឋានគ្រឹះមួយសម្រាប់កំណើនរយៈពេលវែង។ គោលដៅរបស់យើងគឺ បំពេញតម្រូវការនាពេលបច្ចុប្បន្នប្រកបដោយការទទួលខុសត្រូវខ្ពស់ និងត្រូវធានាអនាគតសម្រាប់ប្រជាពលរដ្ឋរបស់យើង សហគមន៍របស់យើង និងបរិស្ថានរបស់យើង។ប្រភពផ្គត់ផ្គង់ថាមពលអគ្គិសនីយ៉ាងតិច៧០% មកពីថាមពលកកើតឡើងវិញកំពុងឈានទៅសម្រេចបានតាមផែនការនៅឆ្នាំ២០៣០ ជាមួយនឹងប្រភពមកពីធ្យូងថ្មនឹងត្រូវបានបញ្ឈប់មុនកាលកំណត់។ ដើម្បីគាំទ្រដល់ផែនការកាត់បន្ថយការបំភាយឧស្ម័នសុទ្ធសូន្យ ការធានាដោយរដ្ឋបានជួយកាត់បន្ថយហានិភ័យដល់ដើមទុនវិនិយោគឯកជន ជាលទ្ធផលបណ្តាញជាតិកំពុងត្រូវបានពង្រឹងមួយកម្រិតថែមទៀត ជាមួយនឹងប្រព័ន្ធឆ្លាតវៃ និងមានភាពធន់ជាងមុន។ ប្រព័ន្ធស្តុកថាមពលដោយអាគុយ និងបច្ចេកវិទ្យាថាមពលស្អាតផ្សេងទៀតបាននិងកំពុងត្រូវបានដាក់ពង្រាយ អគ្គិសនីតាមតំបន់ជនបទ និងតំបន់ដាច់ស្រយាលកំពុងត្រូវបានបន្តភ្ជាប់បន្ថែមទៀត តម្លៃអគ្គិសនី​​កំពុង​ត្រូវ​បាន​ធ្វើ​ឱ្យ​ប្រសើរ​ឡើង​ ដើម្បី​រក្សា​ថាមពល​អគ្គិសនីឱ្យ​មាន​តម្លៃ​សមរម្យ។ វិធានការទាំងនេះនឹងជួយធានាបាននូវការផ្គត់ផ្គង់ថាមពលអគ្គិសនីប្រកបដោយស្ថិរភាព និងអាចឱ្យទុកចិត្តបាន ក្នុងគោលដៅជំរុញកម្ពុជាធ្វើអន្តរកាលថាមពលឆ្ពោះទៅអព្យាក្រឹតភាពកាបូន។ នោះមានន័យថា ថាមពលអគ្គិសនីដែលអាចទុកចិត្តបានកាន់តែច្រើនសម្រាប់ប្រជាពលរដ្ឋតាមខ្នងផ្ទះ និងអាជីវកម្មខ្នាតតូច នៅក្នុងក្របខណ្ឌទូទាំងប្រទេស។

នៅក្នុងវិស័យរ៉ែ ស្តង់ដារបរិស្ថាន និងសង្គមកំពុងត្រូវបានពង្រឹង ដោយផ្តល់នូវអត្ថប្រយោជន៍ត្រង់និងផ្ទាល់ដល់សហគមន៍ដែលការដ្ឋានប្រតិបត្តិការរ៉ែស្ថិតនៅ តាមរយៈការវិនិយោគលើហេដ្ឋារចនាសម្ព័ន្ធ លើវិស័យអប់រំ និងសុខភាព រួមជាមួយនឹងការជំរុញឱ្យមានឧស្សាហកម្មអាជីវកម្មរ៉ែដែលមានតម្លៃបន្ថែមខ្ពស់ និងពង្រឹងអនុលោមភាព និងការអនុវត្តច្បាប់ឱ្យកាន់តែរឹងមាំ។ ទន្ទឹមនឹងនោះ ការគ្រប់គ្រងវិស័យប្រេងកាត កំពុងត្រូវបានពង្រឹងផងដែរ ដោយមានការយកចិត្តទុកដាក់ខ្ពស់លើការទទួលខុសត្រូវផ្នែកបរិស្ថាន និងសង្គម ឱ្យស្របតាមគោលដៅអភិវឌ្ឍន៍របស់កម្ពុជា។

ក្នុងគ្រប់វិស័យទាំងអស់របស់ក្រសួងរ៉ែនិងថាមពល សេវាសាធារណៈកំពុងត្រូវបានធ្វើទំនើបកម្ម និងបរិវត្តកម្មតាមបែបឌីជីថល។ វិធានការទាំងនេះកំពុងទាក់ទាញការវិនិយោគ លើកកម្ពស់សមត្ថភាព និងបង្កើតការងារបៃតង ដោយផ្តោតលើស្ត្រី និងក្រុមងាយរងគ្រោះ។ ខ្ញុំសូមស្វាគមន៍បងប្អូនក្នុងការស្វែងយល់បន្ថែមអំពីការងារនេះ និងសូមចូលរួមជាមួយយើងក្នុងការកសាងអនាគតកម្ពុជាមួយដែលមានសន្តិភាព សុវត្ថិភាព យុត្តិធម៌ និងការចែករំលែកទាំងអស់គ្នា។

ឯកឧត្តម កែវ រតនៈ
រដ្ឋមន្ត្រីក្រសួងរ៉ែ និងថាមពល