អគ្គនាយកដ្ឋានកិច្ចការទូទៅ

នាយកដ្ឋានរដ្ឋបាល និងព័ត៌មានវិទ្យា មានភារកិច្ចគាំទ្រប្រតិបត្តិការរដ្ឋបាលរបស់ក្រសួងទាំងថ្នាក់កណ្តាលនិងថ្នាក់ក្រោមជាតិ ដើម្បីពង្រឹងសុវត្ថិភាព ធានាប្រសិទ្ធភាពនៃលំហូរការងារឯកសារ សម្របសម្រួលកិច្ចការពិធីការ ផ្គត់ផ្គង់សម្ភារឧបករណ៍ប្រើប្រាស់ ផ្តល់សេវាថែទាំជួសជុល និងគ្រប់គ្រងការពារសន្តិសុខសណ្តាប់ធ្នាប់។ សម្រាប់ការផ្តល់ព័ត៌មានទូទៅនិងសេវាសាធារណៈរបស់ក្រសួង សាធារណជនអាចទំនាក់ទំនងច្រកចេញ-ចូលតែមួយ ដែលមានទីតាំងនៅទីស្តីការក្រសួង ឬតាមរយៈ តំណភ្ជាប់ទៅច្រកចេញ-ចូលតែមួយ ។

នាយកដ្ឋាននីតិកម្ម មានភារកិច្ចគាំទ្រនិងជាជំនួយការលើការងារច្បាប់ពាក់ព័ន្ធរបស់ក្រសួង រួមមាន៖

• សម្របសម្រួលនិងជំរុញការកសាងច្បាប់និងលិខិតបទដ្ឋានគតិយុត្តនានាពាក់ព័ន្ធនឹងវិស័យរ៉ែ ថាមពល និងប្រេងកាត
• ពិនិត្យនិងផ្តល់យោបល់លើការរៀបចំសេចក្តីព្រាងច្បាប់និងលិខិតបទដ្ឋានគតិយុត្តនានា ពាក់ព័ន្ធនឹងវិស័យរ៉ែ ថាមពល និងប្រេងកាត ដែលផ្តួចផ្តើមដោយក្រសួង/ស្ថាប័នពាក់ព័ន្ធ
• ការពារតាមផ្លូវច្បាប់នូវរាល់សកម្មភាពនិងការអនុវត្តរបស់ក្រសួង ព្រមទាំងសម្របសម្រួលដំណើរការដោះស្រាយវិវាទផ្សេងៗ
• សិក្សា វិភាគ តាមដាន និងវាយតម្លៃលើផលប៉ះពាល់នៃលិខិតបទដ្ឋានគតិយុត្ត
• ទទួលបន្ទុកនិងសម្របសម្រួល និងជំរុញការចូលរួមការអនុវត្តកម្មវិធីកែទម្រង់វិមជ្ឈការនិងវិសហមជ្ឈការ និង
• ទទួលបន្ទុកនិងសម្របសម្រួល និងជំរុញការចូលរួមការអនុវត្តកម្មវិធីកែទម្រង់ច្បាប់។

នាយកដ្ឋានផែនការ មានភារកិច្ចសហការ សម្របសម្រួលនិងបូកសរុបផ្ដល់ធាតុចូលលើការរៀបចំគោលនយោបាយនិងផែនការយុទ្ធសាស្ត្ររបស់ក្រសួងជូនរដ្ឋាភិបាល និងសម្របសម្រួលបូកសរុបធាតុចូល​នៃយុទ្ធសាស្ត្រពាក់​​ព័ន្ធនឹងវិស័យ រៀប​ចំនិង​បូកសរុប​ផែនការយុទ្ធសាស្ត្រថវិកា និងតាមដានការអនុវត្តផែនការសកម្មភាពនានា តាមរយៈ​ការបូកសរុបរបាយការណ៍វឌ្ឍនភាពនិងលទ្ធផលការងារតាមវិស័យ ភ្ជាប់ជាមួយនឹងយន្តការតាមដាន ត្រួតពិនិត្យ និងវាយតម្លៃ។ បន្ថែមពីនេះ នាយកដ្ឋាន​ទទួលបន្ទុកប្រមូលចងក្រងនិងវិភាគ​​ទិន្នន័យបន្ទាប់​បន្សំ ដើម្បីរៀប​ចំ​​រ​​បាយការណ៍វិស័យនិងគាំទ្រដល់ការរៀបចំគោលនយោបាយដោយ​​ផ្អែក​​លើភស្តុតាងពាក់ព័ន្ធនឹងវិស័យរ៉ែ ថាមពល និងប្រេងកាត នៅក្នុងព្រះរាជាណាចក្រកម្ពុជា។

នាយកដ្ឋានគណនេយ្យ និងហិរញ្ញាវត្ថុ មានភារកិច្ចណែនាំ គ្រាំទ្រ និងសម្របសម្រួលជាមួយគ្រប់អង្គភាពថវិកាក្នុងការអនុវត្តថវិកា ការពិនិត្យ ការតាមដាន និងការបូកសរុបរបាយការណ៍ រួមជាមួយនឹងការពិនិត្យ ផ្ទៀងផ្ទាត់បញ្ជីសារពើភណ្ឌទ្រព្យសម្បត្តិរដ្ឋ។

នាយកដ្ឋានបុគ្គលិក មានភារកិច្ចគ្រប់គ្រងនិងរៀបចំការងារធនធានមនុស្ស ការផ្លាស់ប្តូរអង្គភាពឬស្ថាប័ន ការកំណត់ត្រាទណ្ឌកម្មខាងវិន័យ ការលាលែងពីតំណែងឬក្របខណ្ឌ ឯកសារចូលនិវត្តន៍និងមរណភាព និងតារាងប្រាក់បៀវត្សរ៍និងប្រាក់ឧបត្ថម្ភ។ បន្ថែមពីនេះ នាយកដ្ឋានធានាបាននូវការលើកកម្ពស់សុខុមាលភាពនិងសេចក្តីថ្លៃថ្នូររបស់មន្រ្តី រួមជាមួយនឹងសុវត្ថិភាពនៅកន្លែងធ្វើការដោយអនុលោមតាមគោលនយោបាយរបស់រដ្ឋាភិបាល។