អគ្គនាយកដ្ឋានធនធានរ៉ែ

នាយកដ្ឋានភូគព្ភសាស្ត្រ-រ៉ែ មានតួនាទីក្នុងការផ្តល់ព័ត៌មានពាក់ព័ន្ធនឹងសក្តានុពលធនធានរ៉ែនៅកម្ពុជា រួមមានការងារភូគព្ភសាស្ត្រ-រ៉ែ ការគ្រប់គ្រងព័ត៌មានធនធានរ៉ែ និងការងារមន្ទីរពិសោធន៍រ៉ែ។

នាយកដ្ឋានភូគព្ភសាស្ត្រ-រ៉ែ​ មានភារកិច្ចដូចខាងក្រោម៖

• ធ្វើការស្រាវជ្រាវនិងសិក្សាលើការស្ទាបស្ទង់ភូគព្ភសាស្ត្រ បញ្ហាបរិស្ថានភូមិសាស្ត្រ គ្រោះថ្នាក់ភូមិសាស្ត្រ អភិរក្សភូមិសាស្ត្រ និងវិស័យភូគព្ភសាស្ត្រផ្សេងទៀត

• លើកកម្ពស់កិច្ចសហប្រតិបត្តិការក្នុងវិស័យភូគព្ភសាស្ត្រ និងធនធានរ៉ែជាមួយដៃគូជាតិ និងតំបន់ ដៃគូអភិវឌ្ឍន៍ អង្គការអន្តរជាតិ ស្ថាប័នសិក្សាធិការ និងអង្គការស្រាវជ្រាវ

• អភិវឌ្ឍធនធានមនុស្សនិងកសាងសមត្ថភាពក្នុងវិស័យពាក់ព័ន្ធនឹងភូគព្ភសាស្ត្ររ៉ែ។

សេវាសាធារណៈ៖

• លិខិតអនុញ្ញាតការធ្វើបុរេសនា

   

សេវាមន្ទីរពិសោធន៍រ៉ែ៖

• វិញ្ញាបនបត្រគំរូ/សំណាកភូគព្ភសាស្ត្រ
• សេវាវិភាគគំរូ/សំណាកភូគព្ភសាស្ត្រ

នាយកដ្ឋានឧស្សាហកម្មអាជីវកម្មធនធានរ៉ែ មានភារកិច្ចដូចខាងក្រោម៖

• រៀបចំ វាយតម្លៃ និងដំណើការពាក្យស្នើសុំសម្រាប់ការចេញ បន្ត កែសម្រួល ផ្ទេរ ជំនួសម្ចាស់ភាគហ៊ុន និង/ឬជំនួសអ្នកគ្រប់គ្រងក្រុមហ៊ុន ឬសហគ្រាស មុនពេលដាក់ពាក្យស្នើសុំការកែប្រែជាផ្លូវការលើលក្ខន្តិកៈអាជ្ញាបណ្ណដើម្បីព្យួរ រឹបអូស និងលុបចោលអាជ្ញាបណ្ណធនធានរ៉ែសម្រាប់ការរុករក និងប្រតិបត្តិការនៃឧស្សាហកម្មរ៉ែ និងប្រភេទរ៉ែផ្សេងទៀត លើកលែងតែរ៉ែសំណង់
• វាយតម្លៃផែនការបិទអណ្តូងរ៉ែ និងស្តារនីតិសម្បទា
• គ្រប់គ្រងការនាំចេញ និងការនាំចូលធនធានរ៉ែ និងផលិតផលរ៉ែដែលទាក់ទងនឹងរ៉ែលោហៈ និងអ លោហៈ
• ចូលរួមក្នុងការវាយតម្លៃ និងការបញ្ចេញមតិយោបល់លើរបាយការណ៍សេចក្តីព្រាងការវាយតម្លៃផលប៉ះពាល់បរិស្ថាន និងសង្គម
• លើកកម្ពស់ការអនុលោមតាមច្បាប់ ស្តង់ដារបច្ចេកទេស និងបទប្បញ្ញត្តិក្នុងប្រតិបត្តិការធនធានរ៉ែ
• ពង្រឹងប្រសិទ្ធភាពនៃការគ្រប់គ្រង និងការអនុវត្តផែនការប្រតិបត្តិការធនធានរ៉ែ
• ពង្រឹងដំណើរការផលិតកម្មរ៉ែ អាជីវកម្មរ៉ែ និងការជួញដូររ៉ែ
• គ្រប់គ្រង និងប្រមូលចំណូលមិនមែនសារពើពន្ធ និងធានាការអនុលោមតាមកាតព្វកិច្ចហិរញ្ញវត្ថុក្នុងអំឡុងពេលប្រតិបត្តិការរ៉ែ
• លើកទឹកចិត្តដល់ការរុករកជម្រករ៉ែថ្មី និងការវាយតម្លៃសក្តានុពលធនធានរ៉ែ
• ចូលរួមចំណែកក្នុងការកំណត់តំបន់ និងជម្រករ៉ែ
• គ្រប់គ្រងប្រតិបត្តិការធនធានរ៉ែ រួមមាន ការស្វែងរុករក ការអភិវឌ្ឍអណ្តូងរ៉ែ អាជីវកម្មរ៉ែ ការកែច្នៃរ៉ែ ការជួញដូររ៉ែ និងការបិទអណ្តូងរ៉ែ
• គ្រប់គ្រងប្រតិបត្តិការធនធានរ៉ែ រួមមាន ការស្វែងរុករក ការអភិវឌ្ឍអណ្តូងរ៉ែ អាជីវកម្មរ៉ែ ការកែច្នៃរ៉ែ ការជួញដូររ៉ែ ការបិទអណ្តូងរ៉ែ និងការស្តារនីតិសម្បទាទីតាំងក្រោយការធ្វើអាជីវកម្មរ៉ែ។

សេវាផ្តល់អាជ្ញាបណ្ណ៖

• អាជ្ញាបណ្ណអាជីវកម្មអណ្តូងរ៉ែបើក និងការដ្ឋានវាយថ្មសម្រាប់ផ្គត់ផ្គង់រោងចក្រឧស្សាហកម្ម
• អាជ្ញាបណ្ណស្វែងរុករក
• អាជ្ញាបណ្ណឧស្សាហកម្មអាជីវកម្មធនធានរ៉ែ
• អាជ្ញាបណ្ណអាជីវកម្មត្បូងថ្មមានតម្លៃ

សេវាសាធារណៈ៖

• កូតានិងវិញ្ញាបនបត្រសម្រាប់ការនាំចេញរ៉ែមាស រ៉ែដែក រ៉ែថ្មក្វាត និងរ៉ែម៉ង់កាណែស 

នាយកដ្ឋានអាជីវកម្មរ៉ែថ្មសំណង់ មានភារកិច្ចដូចខាងក្រោម៖

• រៀបចំ វាយតម្លៃ និងដំណើការផ្តល់អាជ្ញាបណ្ណ ការពន្យារ ការកែសម្រួល និងការផ្ទេរសិទ្ធិ ការផ្លាស់ប្តូរសមាសភាពភាគហ៊ុន ការផ្លាស់ប្តូរអ្នកគ្រប់គ្រងក្រុមហ៊ុន ឬសហគ្រាស និងការព្យួរ ការដកហូត និងការបញ្ចប់អាជ្ញាបណ្ណធនធានរ៉ែសម្រាប់ការស្វែងរុករក និងអាជីវកម្មថ្មសំណង់ ថ្មភ្នំ (រួមទាំងថ្មភក់ និងថ្មម៉ាប) ថ្មបាយក្រៀម ដីក្រួសក្រហម (ឡាតេរីត) ខ្សាច់ចាក់បំពេញ និងដីល្បាប់សម្រាប់វិស័យសំណង់
• វាយតម្លៃផែនការបិទអណ្តូងរ៉ែ និងស្តារនីតិសម្បទាទីតាំង
• គ្រប់គ្រងការនាំចេញធនធានរ៉ែ និងផលិតផលរ៉ែ និងការនាំចូលធនធានរ៉ែ ដោយមិនរាប់បញ្ចូលការលក់ ការនាំចេញ និងការនាំចូលលោហធាតុមានតម្លៃ និងត្បូងមានតម្លៃ ទាំងមិនទាន់កាត់ និងកែច្នៃ
• ចូលរួមក្នុងការវាយតម្លៃ និងការផ្តល់មតិយោបល់លើរបាយការណ៍សេចក្តីព្រាងការវាយតម្លៃផលប៉ះពាល់បរិស្ថាន និងសង្គម
• គ្រប់គ្រង និងកៀរគរចំណូលមិនមែនសារពើពន្ធ និងធានាការអនុលោមតាមកាតព្វកិច្ចហិរញ្ញវត្ថុក្នុងអាជីវកម្មថ្មសំណង់ ថ្មភ្នំ (រួមទាំងថ្មភក់ ថ្មម៉ាប) ថ្មបាយក្រៀម ដីក្រួសក្រហម (ឡាតេរីត) ខ្សាច់ចាក់បំពេញ និងដីល្បាប់
• ពិនិត្យ និងវាយតម្លៃបរិមាណសក្តានុពលនៃថ្មសំណង់ ថ្មភ្នំ (រួមទាំងថ្មភក់ ថ្មម៉ាប) ថ្មបាយក្រៀម ដីក្រួសក្រហម (ឡាតេរីត) ខ្សាច់ចាក់បំពេញ និងដីល្បាប់ និងផែនការប្រើប្រាស់ធនធានរ៉ែក្នុងតំបន់អាជ្ញាប័ណ្ណ
• គ្រប់គ្រងអាជីវកម្មថ្មសំណង់ ថ្មភ្នំ (រួមទាំងថ្មភក់ ថ្មម៉ាប) ថ្មបាយក្រៀម ដីក្រួសក្រហម (ឡាតេរីត) ខ្សាច់ចាក់បំពេញ និងដីល្បាប់ ព្រមទាំងការធ្វើអាជីវកម្មធនធានរ៉ែ និងផលិតផលរ៉ែ និងការបិទទីតាំង។

សេវាផ្តល់អាជ្ញាបណ្ណ៖

• អាជ្ញាបណ្ណអាជីវកម្មអណ្តូងរ៉ែបើកនិងការដ្ឋានវាយថ្ម សម្រាប់ថ្មសំណង់ ថ្មភ្នំ ថ្មម៉ាប ថ្មប្រាក់ ថ្មភក់ ថ្មបាយក្រៀម ដី និងខ្សាច់

   

សេវាសាធារណៈ៖

• វិញ្ញាបនបត្រនិងកូតានាំចេញថ្មសំណង់

នាយកដ្ឋានអាជីវកម្មរ៉ែខ្សាច់សំណង់ មានភារកិច្ចក្នុងការផ្តល់និងគ្រប់គ្រងអាជ្ញាបណ្ណអាជីវកម្មរ៉ែខ្សាច់សម្រាប់ប្រតិបត្តិការនៅក្នុងទន្លេ ស្ទឹង បឹង អូរ និងសមុទ្រ ក្នុងគោលបំណងបម្រើដល់វិស័យហេដ្ឋារចនាសម្ព័ន្ធនិងសំណង់ ដោយផ្គត់ផ្គង់ខ្សាច់សម្រាប់តម្រូវការក្នុងស្រុកនិងនាំចេញ ពិសេសការលើកកម្ពស់ប្រសិទ្ធភាពក្នុងការកៀរគរចំណូលមិនមែនសារពើពន្ធនិងកាតព្វកិច្ចហិរញ្ញវត្ថុជាធរមាន។

សេវាផ្តល់អាជ្ញាបណ្ណ៖

• អាជ្ញាបណ្ណអាជីវកម្មអណ្តូងរ៉ែបើកនិងការដ្ឋានវាយថ្ម សម្រាប់ការដ្ឋានរ៉ែខ្សាច់សំណង់

សេវាសាធារណៈ៖

• កូតានិងវិញ្ញាបនបត្រនាំចេញខ្សាច់

នាយកដ្ឋានត្រួតពិនិត្យប្រតិបត្តិការធនធានរ៉ែ មានភារកិច្ចធានាបាននូវភាពអនុលោមតាមស្តង់ដារបច្ចេកទេស សុវត្ថិភាពរបស់ក្រុមហ៊ុនអាជីវកម្មរ៉ែ និងដោះស្រាយវិវាទក្នុងវិស័យរ៉ែ ក៏ដូចជាលុបបំបាត់សកម្មភាពអាជីវកម្មរ៉ែខុសច្បាប់និងអនាធិបតេយ្យ។ បន្ថែមពីនេះ នាយកដ្ឋាន មានភារកិច្ចតាមដានប្រតិបត្តិការបើកនិងបិទអណ្តូងរ៉ែ ដោយសហការជាមួយអាជ្ញាធរមូលដ្ឋាន ដើម្បីគ្រប់គ្រងប្រតិបត្តិការរ៉ែខ្នាតតូច បិទអាជីវកម្មរ៉ែខុសច្បាប់ និងដោះស្រាយរាល់ការរាយការណ៍បញ្ហាពីសហគមន៍។
នាយកដ្ឋានត្រួតពិនិត្យប្រតិបត្តិការធនធានរ៉ែ មានភារកិច្ចដូចខាងក្រោម៖

• ធ្វើសវនកម្មនិងអធិការកិច្ច ដើម្បីធានាការអនុលោមតាមវិធានការសុវត្ថិភាពបច្ចេកទេស សុខភាព លក្ខខណ្ឌការងារ ការការពារបរិស្ថាន និងសង្គមក្នុងប្រតិបត្តិការធនធានរ៉ែ ស្របតាមច្បាប់ បទប្បញ្ញត្តិបច្ចេកទេស និងឯកសារគតិយុត្តនានាដែលទាក់ទងនឹងប្រតិបត្តិការធនធានរ៉ែ
• តាមដាននិងបង្ក្រាបសកម្មភាពខុសច្បាប់ក្នុងវិស័យរ៉ែ តាមរយៈការអនុវត្តច្បាប់និងកិច្ចសហប្រតិបត្តិការក្នុងការអនុវត្តច្បាប់និងនីតិវិធីតុលាការ
• សម្របសម្រួល និងដោះស្រាយវិវាទនិងជម្លោះដែលទាក់ទងនឹងប្រតិបត្តិការធនធានរ៉ែ។